Bandièra01 1180x150: País Invisible

editorial

Comprene la complexitat del conflicte: crida a la reflexion

Comprene la complexitat del conflicte: crida a la reflexion
Comprene la complexitat del conflicte: crida a la reflexion | Reuters/Mohamed Salem

Dins l’encastre de l’infèrn que lo patís l’Orient Mejan, l’orror e la tragèdia revèlan la prigonda complexitat d’un conflicte que dura dempuèi tròp longtemps. Podèm pas permetre que se simplifique la situacion en tèrmes binaris de "bons" e "marrits". Las vidas trencadas, los mòrts e lo patiment d’aquela guèrra crudèla exigisson una analisi mai rigorosa e, sustot, la cèrca d’una solucion que respècte las vida e dignitat umanas, puslèu que de posicionaments ideologics, de sostens politicoeconomics o de mandadisses d’armas als unes o als autres.

D’en primièr, es essencial de comprene que l’Hamàs es un grop armat qu’a causat una dolor incommensurabla amb sos atacs indiscriminats contra la populacion civila. Podèm pas justificar aquelas accions sagnosas amb lo desespèr d’una ocupacion. Mas non podèm pas tanpauc ignorar lo fons de la question: un pòble palestinian oprimit, somés a un secutament constant e a l’ocupacion militara, que, en cèrta mesura, an menat los abitants de la Lista de Gaza a sosténer majoritàriament l’Hamas.

D’autre caire, Israèl, coma estat reconegut internacionalament, a la responsabilitat d’observar las leis internacionalas e de protegir las populacions civilas. Las accions brutalas de l’armada israeliana en responsa a las atrocitats de l’Hamas an exacerbat lo patiment e la violéncia, e sonque crèan un cercle viciós de revenge e destruccion.

Cal condemnar fermament los crimes de guèrra perpetrats pels dos camps e demandar lo compliment del drech internacional. Es crucial de destriar entre la responsabilitat d’un grop armat, e mai terrorista, e la d’un estat, e de remembrar que podèm pas comparar ocupants e ocupats. La solucion, se de verai se vòl una solucion, se traparà sonque dins una mediacion internacionala que la poiriá dirigir l’ÒNU e que deurà promòure lo dialòg, la reconciliacion e l’establiment d’una patz duradissa.

Enfin e sustot, los mèdia jògan un ròtle fondamental dins aquel conflicte. Cal exigir una cobertura jornalistica mai completa e analitica, que supère las emocions per ofrir contèxt, analisi e amira. Aquò nos ajudariá a comprene la complexitat de la situacion e a incitar a un debat constructiu. A l’ora d’ara, se rapòrta mai que mai las emocions e de cases isolats, d’un camp o de l’autre, çò que polariza lo mond e noirís l’antisemitisme o l’islamofobia dins lo país, ja istoricament victima de la violéncia de l’intolerància brutala.

En conclusion, l’orror pòt pas justificar la violéncia, quitament pas nòstra violéncia emocionala contra los israelians o contra los palestinians materializada suls rets socials e per las carrièras del país. Non! La solucion es internacionala e avèm totes la responsabilitat d’ajudar a metre lo ponch final a un infèrn que dura dempuèi 75 ans.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
3.

La solucion es benlèu internacionala, mas mai que mai, la solucion non pòt èsser que laïca…

  • 7
  • 1
Maria Àngel Lagarda
2.

Mercé Jornalet per aqueste editorial !

  • 14
  • 2
Lachaud Pierre
1.

Israel es pas n'impòrte qui dins lo monde. S'es bastit a partir de multinacionalas qu'an aportat de l'argent, qu'an aportat de las tecnicas agricòlas, mesme industrialas, scientificas. A esta botat en plaça per la comunautat internacionala qu'a butit los palestinians sens lòr damandar lòr avis.
Es pas un asard que l'òm es dich qu' Israel era lo 51eme estat daus USA tant las idéias d'Israel eran plan representadas au niveu daus governaments daus USA. Per los uns seria mesme a l'origine de l'attentat contre las doas tors jumelas dins l'attentat dau v-onze septembre 2000.
Es per aquò que quò es un conflicte internacional e non pas un conflicte entre dos pòples.
Los medias sos sos la tutela de Raminagrobis que sosten Israel a causa de l'argent que recevan daus poderos e son pas preissats de denonçar la politique d'Israel.
Aura, Israel es pus sostengut sur lo plan internacional e sa politica porria cambiar. per anar vers una patz emben los arabes sur de basas mai justes o una autra solucion. L'òm pòd pas pensar autrament que de dire que lo conflicte es una lucha entre lo vasa de fer e lo vasa d'argile.

  • 3
  • 3

Escriu un comentari sus aqueste article