A l’acabada de l’an, es ora de far un bilanç e de partejar amb los legeires la situacion financièra de Jornalet, un exercici de transparéncia necessari per comprene ont sèm e ont anam.

Aqueste an 2024, la Generalitat de Catalonha nos a concedida una subvencion de 24 300,00 èuros, dont n’avèm recebuts 19 440,00. La diferéncia de 4860,00 èuros nos deu pervenir en 2025 après qu’avèm presentats los comptes e las memòrias. Una condicion d’aquela ajuda es que nosautres i adugam 6089,00 èuros de fonzes pròpris, fach que nos a portada una escomesa financièra considerabla. Enfin, avèm capitat a obténer 6800,00 èuros de publicitat, de dreches reprografics dels articles e, sustot, de dons dels legeires.

Lo sosten dels legeires es estat clau per arribar tot just a cobrir los 6089,00 èuros que nos caliá aduire. D’efièch, o avèm superat de 711,00 èuros, una pichona borsa qu’a ajudat a atenuar d’autras mancanças. Mas tot es pas estat resolgut. Nos a mancat 4149,00 èuros qu’avèm cobèrt gràcias a un prèst personal de 8000,00 èuros que l’a fach un sòci a l’ADÒC amb un interès del 0%. L’an que ven, quand recebrem la diferéncia de la subvencion, aquel argent serà pas de profièch mas servirà dirèctament per liquidar lo prèst.

Fàcia a aquela situacion, cal tanben preveire que pendent lo primièr trimèstre de 2025, fins qu’arribe la soma mancanta de la subvencion, avèm de besonh de liquiditat per afrontar los pagaments corrents coma los impòstes, lo gabinet d’afars, los serveires d’Internet e los dreches d’imatge demest d’autras despensas indispensablas.

Gràcias al supòrt de la Generalitat, a las entitats qu’an publicada lor publicitat dins Jornalet, als dreches reprografics e sustot als dons dels legeires, avèm capitat a barrar l’an amb las despensas cobèrtas, mas amb un marge plan pichon. Vòstras fisança e collaboracion son estadas essencialas per que Jornalet perseguisca son òbra, en prepausant cada jorn un espaci d’informacions, d’opinions e de debat en occitan per totòm.

Intrarem doncas dins l’an 2025 amb de nòus enjòcs, dont garentir la solvabilitat del projècte mentre qu’esperam las recèptas previstas. Vos encoratjam a contunhar de nos acompanhar, siá en fasent un don, siá en partejant nòstres contenguts suls rets socials, siá en escometent per la publicitat. Cada pichon gèst fa soma e nos ajuda a far lo camin.

Mercés plan a totes e a totas, e bona annada plan granada e acompanhada!

Intradas

Despensas

Podètz sostenir financièrament Jornalet en clicant aicí.