N’avèm ja parlat en d’autras escasenças mas nos vesèm obligats d’o tornar far. Fasèm referéncia als comentaris que los nòstres legeires fan a las nòvas, als articles d’opinion o a las entrevistas. Coma ditz lo nòstre lèma (legís, pensa, escriu), una de las tòcas fondamentalas d’aqueste jornal es l’interlocucion amb los legeires e la relacion dialectica entre eles. Dins aquel sens, Jornalet vòl èsser un ponch d’amassada de totes los occitans e de totas las sensibilitats. Malastrosament, legir e escriure en occitan es pas una practica gaire frequenta, e per aquò sèm contents de portar la nòstra pèira.
 
Ça que la, que favorizem la relacion entre los legeires vòl pas dire qu’acceptem de comentaris e d’opinions a quin prètz que siá. Lo respècte, l’educacion e la tolerància devon èsser d’elements indispensables pel bon foncionament dels comentaris de Jornalet. Per astre, la granda majoritat dels legeires son de personas respectuosas qu’exprimisson lor liura opinion e qu’accèptan las criticas educadas. Ça que la, i a de legeires que respèctan pas aquela libertat e, en consequéncia, genèran de malèsser amb los autres comentaristas e n’aluènhan de novèls. La direccion de Jornalet a ja escafat qualques comentaris, mas lo trabalh de la direccion es pas de far lo policièr e patrolhar permanentament dins los comentaris.
 
En consequéncia, vos pregam encara un còp d’èsser respectuoses amb los autres legeires e d’exprimir las vòstras criticas e los comentaris amb lo respècte màger. Es una question fondamentala pel bon foncionament d’aqueste jornal e, sustot, per ofrir un bon imatge de l’occitanisme a la societat. Se s’assòcia l’occitanisme a la manca de respècte serem los occitans los primièrs prejudicats. Deu pas èsser aital e Jornalet metrem totas las nòstras energias, se cal amb fermetat, per que siá pas aital.