Bandièra01 1180x150: País Invisible

editorial

Las presidencialas e lo vòte occitan

Tornar-mai las presidencialas francesas. Nosautres, los occitans, i podèm pas gaire jogar de ròtle: i sèm coma d’espectators e elegissèm un candidat causit per de dirigents de París. Occitània a pas encara la consciéncia pro fòrta per presentar de candidats del país amb de possibilitats de resultats dignes, coma o fan d'autres territòris, coma Corsega o la Nòva Caledònia. Avèm pas encara una poténcia de mobilizacion e d’organizacion que permeta a l’occitanisme de jogar un ròtle dins la politica francesa. 

 
Çò de vertadièrament desirable pels occitans seriá que los partits politics, de mairitz francesa o pas, aguèsson d'estructuras en Occitània, amb de dirigents politics del país e amb una fuèlha de rota occitana. Seriá bon que los partits presents dins lo país nòstre priorizèsson los nòstres interèsses e que, quand calguèsse, faguèsson front als lors maximals dirigents de París. Qualques politicians nòstres o fan e aquò los onora. Occitània a de politicians dels bons, conscients e coerents dins totes los partits, mas son encara pauques. Ne cal maites perque lo país o merita.

 
Mas i a encara de camin de far. Es per aquò que per aquelas eleccions podèm solament far una causa: votar en pensant a çò que conven mai a Occitània, en marge de se conven o conven pas a França. Cal agachar los programas dels partits e escotar los lors caps. Qu’ofrisson a Occitània en matèria culturala, lingüistica, educativa, durabla, economica e administrativa? Per emplegar una varianta del nòstre eslogan, “legís, pensa, vòta”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
1.

Es per aquò que, malgrat las pressions de qualques companhs, votarai pas Hollande al primièr torn. E benlèu pas al segond tampauc que los socialistes son pas serioses sus de questions coma lo nucleari e d'autras.

  • 4
  • 1

Escriu un comentari sus aqueste article