Bandièra01 1180x150: Comuna de Tolosa

editorial

Quand la victima deven lo colpable

| Guy Masavi
Dimars passat se publiquèt lo resultat de l’enquèsta fisada a l’Inspeccion Generala de la Gendarmariá Nacionala (IGGN) sus la mòrt de Rémi Fraisse. Lo rapòrt conclutz que las fòrças de l’òrdre cometèron pas nada “fauta professionala” del ponch de vista del respècte de las proceduras e de la deontologia. Lo jove Fraisse aviá 21 ans. La publicacion d’un rapòrt aital es mai digna d’una dictatura que d’un estat democratic. Per soquet, dins aquel rapòrt, an mes una mençon de TV Libertés, una cadena ultradrechista, per justificar l’accion policièra al moment de la mòrt de Fraisse.
 
La còla de Jornalet avèm mostrat dobèrtament lo nòstre refús del barratge de Sivens e lo nòstre sosten al movement ecologista opausant. Mas es pas d’aquò que volèm parlar dins aqueste editorial. Voldriam puslèu parlar de la gestion nefasta per l’estat francés de la mòrt del jove tolosan estudiant de botanica, Rémi Fraisse, mòrt a Sivens lo 25 d’octòbre passat, a causa d’una granada de gases lacrimogèns lançada per la polícia.
 
Independentament de la violéncia dels manifestants o dels policièrs, un jove es mòrt, e après una tragèdia tan granda, la reaccion qu’esperam d’un estat democratic es la seguenta: demandar perdon, indemnizar las victimas, trobar las responsabilitats e daissar l’enquèsta en mans de la justícia. Mas a l’ora d’ara, luènh de demandar perdon, cap de demission s’es producha, cap de responsabilitat s’es presa. Al contrari, an ensajat de culpabilizar la quita victima e lo movement que l’entorneja.
 
Per far una restanca son capables de tuar un jove e de provocar una crisi sociala. Deu èsser fòrça important aqueste projècte.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernest Guevara Jr. L'Avana
5.

« Per far una restanca son capables de tuar un jove e de provocar una crisi sociala. Deu èsser fòrça important aqueste projècte. » Es benlèu mens aqueste projècte qu'es important, que non pas l'ideologia que contèsta aquesta mena de projèctes. Nos cresián adormits, cap e tot anestesiats. E ben mainatz-vos que sèm vius ! Totes, a despart d'un, adara…

  • 12
  • 0
cissonet occitània
4.

D'escotar...

http://www.franceculture.fr/emission-terre-a-terre-territoires-sans-menagement-2-sauvegarde-de-la-zone-humide-du-testet-2014-11-

  • 4
  • 0
Piroulet
3.

Cresi que siái pas estat pro clar. Lo Casanòva corrís pertot ont pòt caçar de simpatía per pas aver de reconéisser la cagada d'estat que lo mai naut responsable es el. Aviam ja conegut aquò -de se mainar de tot e de pas res- amb lo pichòt barcejaire.

  • 4
  • 0
Terric Lausa Quilhan
2.

Fòrça tristament es un editorial que m'agrada. M'agrada que le linha editoriala de mon jornal preferit denóncie las derivas vergonhosas de l'estat francés. Aqueste estat, jorn aprèp jorn clarament pren posicion coma enemic del pòble occitan. Per l'assasinat d'aqueste paure jove nòstre, l'estat jamai demandarà pas perdon. La crosada antioccitana contunha.

  • 11
  • 7
Piroulet
1.

E ara lo Casanòva es a batre la picapandra per se trapar ont que siá que i aja de degalhs: d'un aigat a l'autre, d'una malafacha a l'autre. Veirètz, se vos han panat la bicicleta, petaçatz-vos per que la "Desfacha" ne parle, e veirètz arribar lo Sinistre de l'interior amb cameràs e jornalistas.

  • 4
  • 2

Escriu un comentari sus aqueste article