Bandièra01 capçalera  1180x150: Novestivada

editorial

8 de març: Jorn Internacional de la Femna

| Soman
Quita pas d’èsser ofensiu que las femnas del Mond ajan un jorn consagrat a elas, talament, coma se foguèsse lo Jorn Internacional de la Tèrra o lo Jorn Internacional de la Lucha contra lo Càncer. Destinar un jorn a una causa es un simptòma indubitable qu’aquela causa se pòrta en una situacion delicada. Per exemple, i a pas cap de Jorn Internacional del Comèrci ni cap de Jorn Internacional de la Guèrra. Que las femnas ajan un jorn consagrat es, lamentablament, la pròva evidenta d’una trista realitat.

Òm pòt pensar que las femnas europèas, e las de qualques autres endreches avançats, an pas de problèmas grèus. Es vertat sonque en partida. L’egalitat ensaja de se generalizar e la legislacion la defend davant lo masclisme, lo secutament o los abuses al trabalh. I a, evidentament, fòrça cases de violacion de lors dreches e la violéncia masclista s’arrèsta pas. Totun es innegable que nàisser en Euròpa, en Austràlia o en Canadà es melhor per una femna que dins d’autres endreches. Mas aquela relativa situacion confortabla de la femna occidentala nos deu pas far pèrdre la perspectiva: la majoritat de las femnas de la planeta vivon dins d’endreches ont l’egalitat dels genres es de sciéncia-ficcion.

La còla de Jornalet nos volèm solament solidarizar amb las femnas oprimidas del Mond e far una crida a l’atencion sus la grevissima injustícia que patisson dins totes los païses de la planeta. Las femnas europèas an luchat per una egalitat amb fòrça mancas e es lo trabalh de totes de demostrar al Mond que la discriminacion de la femna es una malautiá masclista e fanatica que se pòt combatre e destruire. Esperam que qualque jorn, poirem escafar del calendièr lo Jorn Internacional de la Femna e consagrar lo 8 de març a festejar lo Jorn de l’Egalitat dels Genres.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

JCD
6.

Coma Lutz, me sembla plan mielhs de dire e d'escriure Jornada internacionala daus drechs de las femnas. Qu'es aquò aquela abstraccion "LAFEMNA" ? D'autant mai que de nombrosas lengas utilizan aquela denominacion au plurau. L'i a pas de rason de segre lo francés de l'ONU sens comptar que las associacions feministas (e mai lo quite ministeri francés !) son pas favorablas au singular, quau que siá la lenga, qu'implica un biais de veire "naturalista" mauvengut. Afen, aquela jornada es segur lo jorn pieg que tot que los masles botjan dins los estereotipes los mai usats. "Vei-te 'quí un floquet de flors Honey, te fai plaser ?"

  • 3
  • 3
Guilhèm Thomàs Tolosa
5.

Los òmes an besonh dels dreits de las femnas. Ven amassa tot aquò.

Soi tanben d'acòrdi per far la diferéncia dintre "... de la Femna" e "... dels dreits de las femnas". La primièra sacraliza la femna (e l'ambigüitat ideologica que ven amb), alara que la segonda prepausa una luta per de causas concretas, realas, un societat a bastir amassa.

Los qu'auràn legit la Virginie Despentes (véser "King Kong theory", o d'autras) comprendràn plan tot aquò.

  • 3
  • 1
Òsca
4.

òsca!!: "Esperam que qualque jorn, poirem escafar del calendièr lo Jorn Internacional de la Femna e consagrar lo 8 de març a festejar lo Jorn de l’Egalitat dels Genres."

  • 4
  • 1
Ernèst Guevara Jr. L'Avana
3.

8 de març: Jorn Internacional de la Femna ? Mas… aquò sembla significar que del 8 de març al 7 de març de l'annada seguenta, vivèm los jorns internacionals de l'òme. Aquò non me sembla pas gaire equilibrat.

  • 3
  • 0

Escriu un comentari sus aqueste article