Bandièra01 capçalera  1180x150: Novestivada

editorial

Rodés coma ponch de rescontre nacional

Un an de mai, los jorns de l’Estivada de Rodés son plan soslinhats dins las agendas dels occitanistas e dels amants de la cultura. La programacion d’ongan es fantastica e excepcionala, mas sabèm ja, tre ara, que la programacion de l’an que ven serà encara mai fantastica e excepcionala. L’arma de l’Estivada, en Patric Roux, es un trabalhador infatigable e un occitanista convencut, que trabalha per dignificar la cultura e la lenga del país amb de critèris de rigor, modernitat e perfeccionisme que meritan tota la nòstra reconeissença.
 
Coma totjorn, i aurà de personas que se retrobaràn a Rodés, qu’es vengut lo ponch de contacte de referéncia entre los occitans venent dels quatre ponches cardinals. I a d’amics qu’an ja establit la lor amassada annala a Rodés, en enfortissent aital una convocacion que va delà la musica e la cultura. De vièlhs occitanistas que fa de temps que se veson pas sabon que, coma cada an, se retrobaràn en un concèrt, en un talhièr de cosina o en una conferéncia. Rodés es uèi un dels grands ponches de referéncia sociala per fòrça personas, e es bon que siá aital.

Occitània, coma o avèm dich d’autres còps, es un país enòrme, amb una granda diversitat culturala, païsatgistica, gastronomica, economica e sociala. Es per aquò que, se volèm aspirar a èsser un país normal, nos cal rescontrar mai, nos cal parlar mai, nos cal connectar mai e nos cal conéisser mai. Solament aital trencarem la fragmentacion e avançarem dins l’unitat. Occitània a de besonh de ponches d’amassada coma un peis a de besonh l’aiga. Rodés es un d’aqueles ponches d’amassada e per aquò la siá importància es fondamentala.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

garric
24.

#22

Comprèni plan çò que dises. L'Estivada es un rasal occitanista, e i a de dificultats per anar quèrre dels artistas occitans del defòra. Soi segur qu'Auvèrnha e Lemosin an per exemple de cabretaires de qualitat, que jamai vesem pas a l'Estivada, perqué son pas occitanistas. E pr'aquò, es plenament de la cultura occitana. Es aquí dessús que lo festenal jògarà sa credibilitat, en evitar la trapèla de l'embarrament. Mès atencion, lo critèri de causida dèu totjorn èstre la qualitat e lo professionalisme de l'artista...

  • 2
  • 0
Matieu Castel Amians
23.

#19 L'a una part de veritat dins çò que dies... Aquesta critica l'ai ausida tanben de la boca de quauqueis uns que son estats programats.

Pasmens, Moussu T canta pas solament en francés, e au contra de certanei formacions programadas, eu saup parlar la lenga e prepausa quaucaren d'originau, a tot lo mens.

  • 3
  • 0
Matilda Pau
22.

#21

E coneishi plan lo monde de la musica.......Per m'interessar a la musica occitana e en tot estar musicologa te podi diser qu'en ei entenut de las mèrdas musicalas que s'en van dens los hestenaus occitans com estelas occitanas! Vergonha!

  • 4
  • 3
Matilda Pau
21.

#20

Soi pas briga musiciana frustrada mossur! Soi musicaire baroca e musicologa e plan urosa dens lo men mestièr! Pensi a d'amics mens

  • 5
  • 2
Cedric de Radio Occitania
20.

#19 Ah musiciana frustrada de pas esser retenguda... vaqui calia commençar per aquò... e amb qu'una formacion jogas ?

  • 4
  • 6

Escriu un comentari sus aqueste article