Bandièra01 1180x150: País Invisible

editorial

Per lo Carnaval Bearnés

| www.carnavalbiarnes.com
Totes los occitanistas de bona fe recebèrem amb gaug las paraulas de François Bayrou, quand exclamèt “qu’ei acabat lo temps de la vergonha!”. Èra un dels primièrs còps qu’un remarcable membre de la classa politica exagonala emplegava la lenga occitana per far una revendicacion en clau occitanista. Per aquela rason recebèt de grands aplaudiments e de mòstras de sosten. Semblava que, fin finala, los vents del cambiament començavan de bufar e pr’amor d’aquò, lo fach que Bayrou venguèsse cònsol de Pau foguèt coma dobrir una pòrta a l’esperança.
 
Totun, coma o publiquèt aqueste jornal dimècres passat, l’adjonch al cònsol de Pau, Sénher Lacoste, a decidit de cambiar lo Carnaval Bearnés. La comuna repròcha a l’associacion Carnaval Pantalonada d’organizar un Carnaval tròp tradicional “mancant de modernitat e d’interculturalitat”. Tè! Los meteisses arguments del temps de la vergonha, qu’encara uèi s’emplegan contra la practica de l’occitan.
 
Coma totes o sabèm, lo Carnaval Bearnés es una de las fèstas ont la lenga occitana es mai presenta, ont las cançons popularas las cantan en occitan los mai grands e los mai pichons, e ensems qu’an facha d’aquela fèsta la lor fèsta. Davant aquelas decisions destinadas a desnaturalizar l’eveniment, Carnaval Pantalonada a anonciat que renóncia a organizar lo carnaval l’an que ven, e es aital qu’après 30 ans, aquela manifestacion màger de la cultura occitana arribarà a sa fin se se tròba pas una solucion o qualqu’un que prenga lo brandon.
 
Cresèm onèstament que Bayrou a agut tòrt e son govèrn municipal a creat un problèma ont n’i aviá pas cap. Fins ara Carnaval foncionava plan dins la capitala de Bearn, èra un succès d’assisténcia e plaçava la vila de Pau dins lo grop de tèsta dins la defensa de la lenga e la cultura occitanas. Es possible que l’adjonch al cònsol siá estat mal conselhat. O es possible qu’aja pas remarcat las raices popularas qu’an assolidat lo festenal. Pr’amor d’aquò, amb tota la cortesiá e la bona fe, la còla de Jornalet demandam a la vila de Pau de reconsiderar sa decision, de començar las negociacions amb los organizaires del Carnaval Bearnés e de trobar una solucion. Demandam pas que d’unes sián los venceires e que los autres los vencuts. Demandam solament un dialòg sincèr e dobèrt que permeta a Pau de gardar un dels carnavals mai autentics del país.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

roucau
4.

Carnaval qu'avè, subvencions de papèr ! Carnaval qu'avè, subvencions de papèr ! Subvencions de papèr Tà dansar leugèr Adiu Carnaval, Tròp d'òra, tròp d'òra Adiu Carnaval, Tròp d'òra te'n vas !

  • 3
  • 11
Viaule Sèrgi
3.

"Totes los occitanistas de bona fe recebèrem amb gaug las paraulas de François Bayrou"; paures occitanistas innocents que fan encara e totjorn fisança als politicards del partits franceses! Cossí far fisança a un gus que refusèt de longa -quand èra president de Conselh General dels Pirènèus-Atlantics- la creacion d'un despartament basc? Paures occitanistas innocents que fan encara e totjorn fisança als politicards del partits franceses!

  • 6
  • 0
Gisèla Plantapati Niça de la còsta plena
2.

Aqueu que vòu tuar lo sieu can, l'acusa d'aver la ràbia...
Una pròv'òc de mai, pròva que son lu occitans que son de còups lu mai còntra l'occitan e la sieu expression.

  • 5
  • 0
lachaud dornasac (87)
1.

La batalha se sarra entre los beus comis politics de l'estat que siajan de dreichas o d'esqueras e los tenants d'aqueus que volan las lengas regionalas e parlar de l'istòria que s'es passada dins lòr region.
L'estat a paur; l'estat vòl pas morir.
Pertant , seria bon qu'anessam vers un estat que prendria en compte lo regionalisme, l'autonomisme mesme l'independença de las regions. Si Bretanha es independenta, segur que degun la prendra e l'emmenara au mitan de l'Atlantique. Independenta o autonomiste las mesmas regions seran obligeadas d'establir de novelas relacions entre elas e benleu definir una federacion de las regions sur de novelas basas.
Si Bayrou ataca lo carnaval de Pau es pas sens rason e segur pas per nar vers una reflexion prigonda sur lo carnaval. Si zo fai quò es qu'i a a Pau, belcòp de résistenças a la lenga. Lo front nacionau es pas lonh.
N'i a pron d'esser mesprisat. N'ai mon confle de veire la region Limosin sinhar una convencion emben l'estat sens una linha per l'occitan, sens una linha sur los trobadorrs, sur los plantagenets, Alienor d'Aquitena e autres. N'ai mon cofle de veire las regions s'isolar las unas de las autras e traitar
emben l'estat; quò s'apela divisar per mielhs renhar.
Anem per la lenga e Hi. FO Fo OOO...

  • 8
  • 0

Escriu un comentari sus aqueste article