Bandièra01 capçalera  1180x150: Novestivada

editorial

La guèrra siriana e la comunautat internacionala

Siria pèrd de sang pertot. Lo regim del president Bashshar Al Asad reprimís las protèstas popularas amb una cruseltat que fa paur. Los masèls de civils e las atrocitats comesas contra la populacion, verificadas per d’organizacions independentas de dreches umans, son venguts d’informacions abitualas dins los informatius d’en pertot. Los rebèls, del lor costat, son de mai en mai armats e organizats e fan d’accions mai gausadas, en tustant lo còr del govèrn dins las quitas carrièras de Damasc. Per tot aquò, en Siria i a pas cap de Prima Aràbia ni tanpauc una revòlta populara: sèm a veire una vertadièra guèrra dins un dels endreches mai convulsats de la planeta.

Los govèrns d’Euròpa e dels Estats Units, coma poténcias occidentalas que dison defendre la democracia per lo mond sencer, agachan aquela guèrra entre l’estupor e l’indignacion. La dialectica de las condemnacions diplomaticas e la retirada de qualques ambaissadors provòcan pas cap de reaccion de la part del govèrn sirian. Los viatges amont e aval de Kofi Annan an pas portat cap de resultat e lo govèrn sirian sembla qu’aja pas cap d’intencion de dialòg per cercar una sortida negociada del conflicte. Los rebèls, qu’inicialament n’èran partidaris, sembla qu’ara o fisan tot a la victòria sul prat batalhièr.

E França? Coma anciana poténcia coloniala del país, lo govèrn de París a una responsabilitat addicionala dins tot aquel drama. Lo govèrn de François Hollande pòt pas limitar la siá accion a la pression diplomatica. En d’autres conflictes, dins d’autres païses, a demostrat una accion mai energica. Los refugiats s’amassan a la frontièra turca e an de besonh de secors. Dins dos meses, lo freg arribarà a las montanhas turcas. Cal que França mene l’accion umanitària per ajudar los refugiats sirians e cal que França mene la recèrca d’una sortida negociada, politica e immediata a la guèrra. L’istòria e la responsabilitat o reclaman aital.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Batko
3.

Desencusatz se mancan los accents, mes escrivi dab un claver polones. Aubert a cent cops rason, cau pas brica creser co que dison los medias deus paises de l'OTAN qu'es sonque propaganda de las sordeish. Sus autes medias (rus en particular) que muishan los eheits de las accions deus "combattents de la libertat" qui ne hen pas nats detalhs contra la populacion civiu qui n'es pas dab eths (alaoitas en particular). La situacion es mei complicada qu'aquo. Calere pas que lo Jornalet sia lo rebomb de las mensorgas imperialistas.

  • 7
  • 2
Herri Bataki Near Cape Guy
2.

#1 Mercí hèra per aqueth comentari. En efèit las versions deus jornaus deus païses liures de la doctrina imperialista (Cuba o Veneçuela), que balhen de vejaires plan desparièrs deus oficiaus.

Çò que'm hè mèi hrèita b'ei lo resultat deu sondatge de Jornalet. Non pòdi pas créder que la majoritat d'occitans son per ua intervencion armada, a la faiçon d'Iraq o de Líbia. E èm hòus, que!

  • 5
  • 3
aubèrt gorreth alaroa
1.

amics, que cau pas créder tot çò que dison los médias, especiaument los francés!!

que'vs conselhi d'agachar d'autes televisions e liéger d'autes jornaus, sustot aqueths que repeteishen pas la version deu departament d'estat nordamerican.

salut.

aubèrt

  • 6
  • 4

Escriu un comentari sus aqueste article