Bandièra01 1180x150: Comuna de Tolosa

entrevista

“Avèm un molon de sorires que revenon a cada eveniment”

Carnsaladièr e organizaire d'eveniments culturals a Peirafuec (Nauta Val de Var)

| Rafèu Tchapakaz

La lenga retròba la sieu plaça au vilatge e mi fa un grand plaser!  Organizam nòstres eveniments sensa sosten autre qu’aquest dau public. Mas nos en servèm per ajuar a l’escòla comunala


Rafèu Radreau es elegit municipal de la comuna de Peirafuec (Nauta Val de Var) e organizaire d'eveniments a l'entorn de la lenga e la cultura occitanas. Nascut a Montbéliard, en Franca Comtat, demòra dins la val d'Esteron dempuèi 16 ans ont trabalha coma carnsaladièr. Convèrsa amb Laurenç Revèst.

 
 
D’ont vos ven l’interés per l’occitan e la cultura occitana?
 
Ai descubèrt l’occitan a l’escota dei grops coma Massilia Sound System, La Talvera e lei Fabulous Trobadors, e mai de grops niçards emb Nux Vomica, Lo Mago de’n Castèu e Jan-Luc Sauvaigo qu’avèm agut lo plaser d’aculhir en 2010 per un concèrt peirafuguench. Tot aquest monde qu’ai poscut rescontrar m’a donat l’enveia de saber, de comprene e subretot de posquer charrar e si rire totei ensems.
 
 
Perqué aver creat despí 10 ans la seccion Chorma d’ESTER’on Oai dins vòstra comuna?
 
Es perqué amb lei collègas de Peirafuec e lo sosten de Massilia Chorma (que siam sòcis), avèm creat la seccion peirafuguencha d’aquela associacion. Es una associacion qu’a per objectiu de donar un molon d’ocasions de s’acampar dins la musica, la dança, la fèsta e mai dins l’espòrt. Per exemple la 10a edicion de nòstre Balèti dei Oliviers emb lo Vesubié Social Club de Manu Càceres.
 
Per sovenir, aquest eveniment, en 10 annaas, a ja vist passar la Banda de Nux Vomica, Uni T, Djé de Raggapero, Monk in the Cage, Mauresca Fracàs Dub, Original Occitana, lo Mago de’n Castèu, Zine, Lei Parteplus, La Talvera, Lo Zgain, Fai Deli, Janvié Claider D, Doctors de Trobars. Mas tanben, avèm organizat de concerts dos còps emb Moussu T e lei Jovents, Toko Blaze, Papet J, Ad Libido, e Jan-Luc Sauvaigo & l’Ontario (17 annaas après lo sieu darrier pontin!).
 
Avèm aculhit la classa de 2a de Patrici Arnaudo, professor d’occitan niçard en licèu per una jornaa pedagogica entorn de l’òli e dei abelhei. Organizam tanben cada annaa un torneg de Juec de Bala au Tambornet, la Fèsta dei Castanhei e de corses de dança tradicionala. 
 
 
Que foguèt e qu’es la recepcion deis eveniments organizats per vòstra associacion per la populacion?
 
Avèm un molon de sorires que revenon a cada eveniment: es nòstre espèr! Pas mai de fiertat mas totjorn l’enveia de far encara e encara... La lenga retròba la sieu plaça au vilatge e mi fa un grand plaser! 
 
 
Seriá possible de crear una escòla associativa coma una calandreta, subretot en mitan rural coma en Esteron?
 
Segur! Una escòla es lo mieu pantais, mas... es pas aisit: siam luenh.  
 

Per vòstra associacion, que son lo camin, lei trabucs, lei bilanç per lo moment?
 
Organizam nòstres eveniments sensa sosten autre qu’aquest dau public. La municipalitat nos dona quauqua ren e trobam lo gèst polit. Mas nos en servèm per ajuar a l’escòla comunala. 
 
 
Qu’es la situacion de l’occitan aüra en cò vòstre, la sieu visibilitat, la sieu transmission?
 
I es un pauc lo comitat dei fèstei dins lei aubadei que si fa davant cada maion per preparar lo festin (fèsta patronala) mas siam solets d’esclairar la cultura occitana... damatge. 
 
 
Parlatz occitan en familha, amb vòstre entorn?
 
Òc, de mai mei enfants aprenon l’espanhòu, doncas ai una facilitat per transmetre una lenga latina.
 
 
Avètz una experiéncia d’elegit comunal, i èran de cauvei per l’occitan de far?
 
Òc, de 2008 a 2012: a la comission escolara e la gestion de l’aiga.
 
Mas ai pas acabat lo mandat per una diferéncia d’avejaire sus lo biais de veire la politica. Preferissi l’accion associativa: fa mai de sensacions!
 
 
Que son vòstres projèctes (eveniments, ràdio, mèdias, musica, autres)?
 
Doncas, après lo 10n Balèti deis Oliviers, lo 2 de setembre a Pèirafuec emb Vesubiá Social Club e lo Son du Marché (lo mitic Sound System varés), contunhar.
 
 
Coma l’occitan seriá sauvable partent de la situacion actuala?
 
Pensi que l’ajua porriá passar per una campanha de sensibilizacion a l’aprendissatge de la lenga dins cada escòla. Si deuriá crear, per donar la facilitat de subvencionar lei creacions de classa. E subretot que lei municipalitats oblidèsson pas d’incitar a s’interessar a la lenga via lei panèus en occitan dins lei carrierei. 
 
 
 Avètz de reflexions sus l’actualitat?
 
Que dire de mai que totei lei solucions son en cadun de nosautres: siam ja dins lo respècte e la tolerància. Avèm tant de plaça sus tèrra sensa frontiera... 
 
 
 
 
Laurenç Revèst
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article