Bandièra01 capçalera  1180x150: Novestivada

entrevista

“La decision de David Sassoli de non reconéisser pas Oriol Junqueras es un abús de poder”

eurodeputat

| wikipèdia

Carles Puigdemont e Toni Comín son de deputats de plen drech e pòdon representar los electors que los elegiguèron Sénhers Puigdemont e Comín son estats acceptats coma membres de l’Aliança Liura Europèa L’UE deu permetre que las partidas dialòguen e tròben una solucion concertada Quand tornarai, poirai portar las opinions de Junqueras e de Romeva. Las vòli partejar amb lo grop dels Verds per espandir nòstra reflexion


Benoît Biteau (1967) es un eurodeputat dels Verds nascut a Roian, just sus la riba nòrd de Gironda, del costat santongés. Es autor del libre Paysan résistant ! (2018) ont explica son projècte d’agricultura ecologica e fa partida de la plataforma d’eurodeputats Catalonha-UE que sostenon los presonièrs politics e los exiliats independentistas catalans. Son grop parlamentari, que jonh los Verds e l’Aliança Liura Europèa (ALE), es a debatre se deu acceptar Carles Puigdemont e Toni Comín. Per aquela rason, Biteau es anat, amb d’autres eurodeputats, en Catalonha per vesitar los presonièrs politics Oriol Junqueras, ara elegit eurodeputat, e Raül Romeva, que foguèt tanben elegit, fa qualques ans, dins l’eurocambra dins l’ALE. La velha de sa vesita de la preson, lo 21 de genièr, lo jornalista Andreu Barnils li faguèt una entrevista per Vilaweb. En seguida vos en prepausam una adaptacion en occitan gràcias a l’acòrdi de cooperacion qu’avèm amb lo quotidian numeric catalan.

 
 
La setmana passada, anèretz a la conferéncia de premsa en donant la benvenguda a Carles Puigdemont e Toni Comín.
 
Tanlèu intrar dins lo Parlament Europèu m’incorporèri a la plataforma de dialòg entre l’UE e Catalonha. Aquel grop de deputats, constituit en novembre de 2017, considèra que la question catalana es una question politica e non pas judiciària. Partegi totalament aqueste vejaire. L’UE deu permetre que las partidas dialòguen e tròben una solucion concertada. Quant a Carles Puigdemont e Toni Comín, son de deputats de plen drech e pòdon representar los electors que los elegiguèron. Es una bona causa.
 
 
Seretz en Catalonha per vesitar los presonièrs politics. Qu’esperatz de la vesita?
 
Serai a Barcelona deman e divendres per rescontrar los presonièrs catalans e, mai precisament, Oriol Junqueras, qu’es, segon la decision de la Cort de Justícia de l’Union Europèa, membre de l’assemblada europèa. Oriol es doncas un de mos collègas. Aquò me servirà tanben per conéisser Raül Romeva, que foguèt deputat pendent dètz ans, en mai dels autres presonièrs. Es un gèst de solidaritat envèrs las femnas e los òmes que dempuèi mai de dos ans son en preson per una rason politica. La decision del president del Parlament Europèu, David Sassoli, de non reconéisser pas Oriol Junqueras coma membre del parlament es un abús de poder. Aquela decision es pas siá. L’immunitat parlamentària pretend de protegir lo parlament coma institucion, de sòrta que cap de estat i pòsca pas far pression en n’arrestant o en ne perseguissent los membres. Sassoli cediguèt a la pression politica en reculant. La comission de las questions juridicas del Parlament Europèu deurà jutjar de la levada de l’immunitat parlamentària de Sénhers Puidgemont e Comín. Veirem quina posicion auràn e après cossí votarà lo parlament en session plenària. Totun, soi fermament convencut que se lo parlament contunha sus aquela draia de non respectar pas ni l’expression democratica en Catalonha ni la decision de la Cort de Justícia Europèa, aquò marcarà un precedent, e serà pas un signe rassegurant en aquesta Euròpa ont la democracia, de còps, trantalha sus de regims de mai en mai instables. Totun, l’Union Europèa deuriá assumir totalament la foncion de garentir la soliditat de la democracia sul continent. Es pas lo senhal que lo mandèt lo president del Parlament Europèu quand desaprovèt la decision de la Cort de Justícia Europèa.
 
 
Sètz deputat dels Verds. Puigdemont e Comín an sollicitat d’intrar dins lo Grop Verd-ALE. O veiriatz de bon uèlh? I an lor plaça? Los cal acceptar? Perqué?
 
Avètz rason, i a un debat al sen del grop Verd-ALE. Los sénhers Puigdemont e Comín son estats acceptats coma membres de l’Aliança Liura Europèa, qu’es un grop politic qu’entreten una aliança de longa durada amb los Verds dins l’encastre europèu. Diana Riba, ma collèga, membra de l’ALE, es partisana de l’inclusion d’aqueles dos nòus membres, e es tanben lo cas de François Alfonsi.
 
 
Qualques autres deputats dels Verds an exprimit de dobtes sus Sénhers Puigdemont e Comín. E vos?
 
Compreni que dins qualques païses europèus las diferéncias politicas pòdon èsser significativas entre los partits verds e los movements regionalistas. De mon costat, vòli abordar aqueles problèmas dirèctament amb Oriol Junqueras, que foguèt deputat al Parlament Europèu fins en 2012, e Raül Romeva, qu’i foguèt fins en 2014. Quand tornarai, poirai portar las opinions de Junqueras e de Romeva. Las vòli partejar amb lo grop dels Verds per espandir nòstra reflexion.
 
 
 
 
Andreu Barnils
Entrevista publicada originàriament en catalan sus Vilaweb
 



abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

fancesc palma
8.

En Benet Biteau es una persona valenta e onesta que luita per la libertat dels catalans e pels Drets Umans. Urrà !

  • 2
  • 0
Marcèth Avath
7.

#6 imne dels segaires, perdon.

  • 1
  • 0
Marcèth Avath
6.

Me fasètz pensar a l'imne dels segadors, brave òme. Seguètz-vos, seguètz-vos, farem tot petar, kèmçokièm!

  • 1
  • 0
Marcèth Avath
5.

#2 Es a causa de Sassoli a qui l'agrada fòrça l'alhòli e, cada còp que n'avèm a la cantina del parlament d'Estrasborg (es pas tan sovent), lo s'engolís tot d'un sol bocin.

  • 1
  • 0
Marcèth Avath
4.

#3 vos seguètz coma volèz, mon amic.

  • 1
  • 0

Escriu un comentari sus aqueste article