Lo duo de rock occitan Courtial X Kogane presentarà lèu son primièr album entitolat Dirècte. La presentacion se farà amb una serada especiala a Rodés e una autra a Tolosa que los musicians roergasses faràn amb los bearneses Artús e lo còr montpelhierenc Lo Barrut. Los espectacles se tendràn l’11 d’octòbre al Club de la capitala roergassa e lo 12 al Taquin de la Ciutat Mondina.
 
Dirècte es una òbra fòrça esperada ont cada cançon ven de nos èsser presentada dins los darrièrs meses, una per mes, amb un videoclip per caduna filmat en plan-sequéncia dins d’endreches insolits. Cada cançon de l’album a una identitat desparièra, e per aquela rason an enregistrat los videoclips amb de collaboradors diferents e en divèrses luòcs d’Occitània. Quand enregistrèron a Juranson, Ràdio País parlèt amb eles e o raportèt dins Jornalet.
 
Portat per Paulin Courtial a la guitarra electrica e al cant, e per Dimitri Kogane a la batariá, lo duo de rock occitan fan una musica fòrça modèrna inspirada de la tradicion del país amb una energia ferotja.