Bandièra01 1180x150: Comuna de Tolosa

Actualitats

InternacionalPoliticaSocietat

Corsega: de desenats de milièrs d’insulars revendican “Democracia e respècte pel pòble còrs”

En seguida de la crida dels elegits de l’illa, an protestat contra lo govèrn francés qu’a refusat de negociar un estatut politic nòu

De milièrs d’insulars manifestèron dissabte de subrejorn per carrièras d’Aiacciu jol lèma “Democracia e respècte pel pòble còrs”. Los manifestants brandissián de drapèls còrses e de bandeiròlas que demandavan “Democracia”, per protestar contra lo president de la Republica Francesa, Emmanuel Macron, qu’a refusat de negociar un estatut politic nòu per l’illa. La protèsta seguissiá la crida del president del govèrn insular, Gilles Simeoni, que se mostrèt plan content de la reaccion del pòble còrs: “Es un moment istoric, una manifestacion d’una amplor sens precedent a Aiacciu”, çò diguèt als mèdias.
 
Deman dimars, Macron farà sa primièra vesita oficiala en Corsega. Simeoni l’a acusat de prene pas en compte la “dimension politica de la question còrsa”. De son costat, lo president de l’Assemblada de Corsega, Jean-Guy Talamoni, expliquèt a BFM TV que caliá establir un dialòg “sens linhas rojas ni condicions prèvias”. E mai diguèt d’esperar que la vesita de Macron significariá un ponch de dobertura que “rompèsse l’indiferéncia” que França a totjorn mostrada envèrs Corsega.
 
Lo sobeiranisme s’impausèt en decembre passat a las eleccions còrsas provocadas per la fusion de las institucions territorialas e departamentalas. La lista Pè a Corsica, conducha per Gilles Simeoni, ganhèt amb mai del 56% dels sufragis, amb un clar engatjament electoral de menar l’illa devèrs son emancipacion.
 
De fach, las demandas basicas dels còrses son tres: la reconeissença de la lenga còrsa coma egala del francés, l’amnestia pels presonièrs politics, un estatut especial de residéncia per que Corsega pòsca frenar la crompa d’ostals pels estrangièrs que i venon sonque passar l’estiu.
 
Per ara, lo govèrn francés d’Édouard Philippe refusa la cooficialitat de la lenga còrsa pr’amor que la Constitucion francesa establís que l’unica lenga oficiala es lo francés.
 
 
 
 
 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
4.

8 000 manifestants a Ajaccio, raportats a la populacion francesa, serián gaireban 2 milions a París. Es ja quicòm.

  • 2
  • 0
Mèfi ! 31
3.

Situacion parièra a la de Catalonha... Emai opinion publica nacionala...

  • 4
  • 0
francesc palma
2.

Los chovins començant per Macron e acabant per Manelet Valls, son una cola de corronputs podrits que ho encomanen a tots los altres que volen poder tenir un loc alt recomenat a l'Estat. La màfia que solament volen raubar a l'estat e han de mostrar primer jurament als principis de moviment chovinista. Ni libertat, ni igualtat e gens d' egalitat. Qu' enara queda molt per raubar.

  • 3
  • 0
Enric Mala Tèsta
1.

Deman dimars, Macron farà sa primièra vesita oficiala en Corsega. Simeoni l’a acusat de prene pas en compte la “dimension politica de la question còrsa”. Nosautres l'acusam de préner pas en compte la dimlension politica de cap de question ligadas als pòbles, còrses, basques, catalans, occitans, bretons, aprtians, flamnecs, amerindís, creòls, maòris e africans ! Los solets que considèran fins ara sons los Kanakcs que sràn lèu consultats.

De son costat, lo president de l’Assemblada de Corsega, Jean-Guy Talamoni, expliquèt a BFM TV que caliá establir un dialòg “sens linhas rojas ni condicions prèvias”. E mai diguèt d’esperar que la vesita de Macron significariá un ponch de dobertura que “rompèsse l’indiferéncia” que França a totjorn mostrada envèrs Corsega, mas atanben envèrs totes los pòbles autres que francés istoric dins l'espandi de son imperium !

  • 7
  • 0

Escriu un comentari sus aqueste article