Cinc finalas de las Copas de França se tendràn aqueste dissabte 27 en país catalan:

• doas sus la pelena de Pià: Carcassona/XIII Catalan (a 10h30, U15); Lesinhan/Albi (a miègjorn, U17)

• tres a Gilbert Brutus: Divessas Catalanas/Begla (12h30, femeninas), lo dèrbi Carcassona-Lesinhan (15h, Elèit) e la finala de la Copa Nitard dels juniors: XIII Catalan/Tolosa (17h30).

Finala Vilafranca/Vilagalhenc-Argon en Elèit 2

En Elèit 2, Vilafranca ganha totas las partidas dempuèi la debuta de la sason. Recebián en mièja finala la formacion de Carpentràs per una conclusion prevista: victòria dels Roergasses 50-4.

Los Lops rescontraràn dissabte 4 de mai de vèspre a Lesinhan l’esquipa de Vilagalhenc-Argon qu’a eliminat lo campion sortent, Illa: 34-24.

Òm pòt pensar que la Federacion dobrirà puèi las pòrtas de l’Elèit 1 a Vilafranca.

Reviscolament catalan

Los Dragons avián a se faire perdonar lor pietadosa eliminacion en quart de finala de la Cup: desfaita 6-34 fàcia a Huddersfield. Hull KR arribava amb una tièra de cinc victòrias en seguida.

Los Dragons alternèron las cargas dels davants e un jòc mai dobèrt per marcar 5 ensages dins lo primièr temps (26-6) e n’ajustar dos en fin de partida per una larga victòria 36-6 que lor i permet de servar la primièra plaça al classament.

Hull FC a licenciat son entraïnaire, mas aquò càmbia pas los resultats: desfaita 0-58 a St Helens. Wigan bat Castleford pel segond còp en uèit jorns: 36-14. Huddersfield (30-24 a Leeds) e Salford (12-4 a Londres) empòrtan la victòria al defòra. Warrington bat Leigh: 16-14.

Una esquipa de Leigh que los catalans aniràn afrontar aqueste divendres de ser.

Tolosa va melhor

En Championship, dissabte de ser, Tolosa signa una brava victòria fàcia a Whitehaven: 40-4. Aqueste dissabte 27, aniràn jogar a Wakefield.

Lo club va beneficiar d’una melhora exposicion mediatica: la cadena ViàOccitanie repren totas sas partidas a domicili.

Lo dissabte 29 de junh, sus l’estadi Ernèst Wallon, tres rescontres son previstes: los Anglatèrra-França femenin e masculin e la partida TO-Featherstone.

Pluèja de punts en NRL

La tardor mena las pluèjas en Austràlia e cèrtas partidas de NRL semblèron de rugbi-piscina! I agèt d’aiga, mas tanben de punts!

30-12 pels Dragons fàcia als neozelandeses; victòria dels Dalfins sus las Anguialas dins una partida deslocalizada a Darwin: 44-16; 22-6 per las Pantèras fàcia als Tigres; 34-30 per Manly cò dels Titans; 34-10 pels Bròncos fàcia a Canberra; 36-12 pels Dògols fàcia a Newcastle. Las Làmias sèrvan la primièra plaça mercé a una victòria fàcia als Vaquièrs: 42-6.

Dijòus, Melbourne èra anat batre los Polets a Sydney: 18-12 .