Bandièra01 1180x150: Comuna de Tolosa

Actualitats

L’escalada de las violéncias policièras contra los Gilets Jaunes

La violéncia de la polícia francesa per reprimir aquela crisi sociala es estada extrèmament inquietanta e sens precedents

| La Plume Libre
Lo movement dich dels Gilets Jaunes, que comencèt amb de protèstas contra la pojada dels prèses dels carburants e las politicas economicas del president Emmanuel Macron, a provocat una crisi politica dins l’estat francés, que son govèrn a ensajat de reprimir amb una violéncia policièra desmesurada amb un bilanç d’un uèlh perdut, de tres mans arrancadas, d’una gauta trencada, d’un jove dins lo còma e d’una femna mòrta entre las mans de la polícia.
 
Es verai que las protèstas dels Gilets Jaunes an portat d’episòdis de susmautas inedits coma la batalha a l’entorn de l’Arc de Trionf de París, e en Occitània l’incendi de la prefectura del Puèi de Velai o los 19 gendarmas nafrats al Polzin (Bas Vivarés). Avèm vist de barricadas, non solament a París mas tanben al país nòstre, particulièrament a Marselha e a Tolosa, ont tanben los manifestants an vandalizat de veirinas e de veituras. Dins aquel sens, lo ministre francés de l’Interior, Christophe Castaner, qualifiquèt los actes violents “d’extrèmament grèus, d’indignes e de vergonhoses” e lausèt sens nuança “lo coratge e l’abnegacion” de las fòrças de l’òrdre. Es atal que tant Macron coma Castaner se son renduts responsables d’accions contràrias a la deontologia e a l’origina de nafras fòrça grèvas, d’amputacions, del còma d’un jove tolosan e de la mòrt d’una marselhesa.
 
Lo quotidian de l’ecologia Reporterre rapòrta las violéncias policièras descadenadas per reprimir lo movement dels Gilets Jaunes, e lor bilanç es extrèmament inquietant e sens precedents.
 
 
Tres mans arrancadas per de grenadas GLI-F4
 
Dempuèi lo 17 de novembre passat, tres personas an perdut una man, doas a París e una dins l’illa de la Reünion, a causa de las granadas explosivas GLI-F4 que las emplegan las CRS, çò es los grops d’intervencion de la polícia nacionala francesa. Lo modèl GLI-F4 conten 25 grams de TNT e aviá ja amputat, abans, una man a Kernitron-al-Lann (Bretanha) dins la prima passada. A París solament, lo 1r de decembre passat, las CRS lancèron 339 granadas d’aquel modèl controversiat. França es lo sol país d’Euròpa a se’n servir contra sa populacion.
 
 
Lo flash-ball, l’arma pus perilhosa
 
Un autre dels projectils emplegats per la polícia francesa son las nomenadas balas de defensa (LBD), tanben apeladas flash-ball. Aqueles projectils de 40 mm de cauchó son benlèu l’arma pus perilhosa dins l’arsenal de las fòrças de l’òrdre francesas.
 
Lo 24 de novembre passat a París, una d’aquelas balas causèt la pèrda d’un uèlh a un òme de 59 ans.
 
 
De tragèdias en Occitània
 
En Occitània, la polícia a provocat de vertadièras tragèdias: a Bordèu, una bala LBD arranquèt la gauta de Guy Bernièr, un òme de 60 ans; a Tolosa, un jove nomenat Benoît es dins lo còma a causa d’un impacte al cap, e a Marselha Zineb Redouane, una femna d’80 ans, foguèt tuada mentre que barrava los contravents de son apartament.
 
A Redouane lo projectil li tustèt la cara del temps que barrava los contravents de son apartament, al 4n estatge d’un immòble près de la Canebiera. Foguèt ferida dissabte e la menèron a l’espital de la Timona e puèi al de la Concepcion, ont moriguèt dimenge, dins una intervencion cirurgicala.
 
Tanben los jorns del jove Benoît de Tolosa son menaçats. Un tir de flash-ball li toquèt lo cap e es dins lo còma. Ara cal saber se la polícia a respectat las consignas d’utilizacion d’aquela arma dins lo cas precís d’aquel tir, qu’a talament ferit un gojat de 2 mètres e 90 kg.
 
 
Tabassat a París
 
Un autre exemple de l’extrèma violéncia policièra d’aquestes darrièrs jorns lo mòstra lo vidèo que seguís. A París, uèch policièrs en tenguda antisusmauta tabassèron un jove solet a còps de pè e de matraca del temps que l’insultavan en li disent “filh de puta”.
 
 

 



 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
15.

L'enemic public numero un de França : Macrona!

  • 1
  • 0
Los Comandos de la Nuèit
14.

#13 Plan vertat, lo Macron es pas sortit parlar als gilets jaunes perque a saique agut paur de se retrobar la camisa arrancada e escaiçada coma aquel d.r.h. d'Air France. Pro plasent per un tipe que per estofar l'escandol BenAllà fasia lo mariol en disent "que me vengan cercar !".

  • 5
  • 0
Abram Auvèrnhe
13.

Quand totas las autras viás pacificas an cacats, segur la violença es necessària ! Lo sindicalista Xavier Mathieu ne'n rapelava justament la necessitat sobre lo platèlh de Canal+ pendent la polemica de las "chamisas arranchadas" de fai quauques mes...

www.youtube.com/watch?v=DlDAxBQ4fzM
www.youtube.com/watch?v=M7NYXh-PVf4&feature=youtu.be&t=3703

  • 7
  • 0
Forcatèl
12.

#10 Fasètz coma tot lo monde legissètz Jornalet perque es gratuit e que n’ i a pas d’autre.
Lo microcòsme occitanista i es acostumat aquò rai. S’es totjorn apiejat sus los que l’an acceptat, valent a dire los extremismes de drecha o d’esquèrra... segon las epòcas.
Piètras ajudas car son d’ideologias patologicas e aquò explica ont ne sèm : dins las simplificacions e las caricaturas...òc duscas a la tota fin, lo patoès farà rigolar.
Me maca.

  • 0
  • 4
Los Comandos de la Nuèit
11.

Insureccio ! Farem tot petar !

  • 7
  • 1

Escriu un comentari sus aqueste article