Marie Laguerre es una joventa de 22 ans qu’estúdia l’arquitectura a París. Aquesta gojata a partejat sus Facebook d’imatges de l’agression masclista que l’a patida en relançant ansin lo debat sus aquela sòrta d’agressions que, malastrosament, son tan frequentas e que lèu seràn punidas dins l'estat francés.
 
Lo 24 de julhet de ser, Laguerre caminava per carrièras devèrs son ostal. Quand passèt près de la terrassa d’un cafè, un òme li diguèt de mots grossièrs de connotacion sexuala e ela, sens s’arrestar, li respondèt “ta gueule !”, una expression francesa equivalenta a “taisa-te, marrida lenga!”. Alavetz, l’òme prenguèt un cendrièr d’una taula e lo lancèt devèrs lo cap de la victima, en anant devèrs ela, qu’a l’encòp se virava tanben devèrs el. Abans que Marie Laguerre poguèsse dire quicòm, l’òme la tustèt a la cara. Qualques clients del cafè se levèron sul pic per la defendre e l’òme partiguèt.
 
“Èra pas lo primèr jorn e èri lassa. Li respondèri “ta gueule !” e contunhèri mon camin. Pr’amor que tolèri pas aquela mena de comportament. Me pòdi pas pus taisar e nos cal pas pus taisar”, çò diguèt Laguerre.
 
Puèi demandèt al cafè los imatges de las camèras de susvelhança e las publiquèt sus Facebook per denonciar l’agression. “Es pas lo sol. Lo secutament es al quotidian. Los òmes que creson d’aver totes los dreches per carrièras, que se permeton de nos umiliar e que supòrtan pas qu’òm se n’escalustre, aquò es inadmissible. Es ora qu’aquel genre de comportaments CÈSSE”, çò ditz sus Facebook.
 
Lo procuraire de París a dobèrt una enquèsta suls faches mas l’assalhidor es pas estat identificat.
 
 
De multas de fins a 3000 èuros
 
La secretària d’estat francesa de l’egalitat entre òmes e femnas, Marlène Schiappa, a mençonat aquela agression sus Twitter del temps qu’a anonciat que lèu intrarà en vigor una lei que prevei de multas de fins a 750 èuros pel secutament verbal, e de fins a 3000 èuros per las recidivas o los que seguirián una persona contra sa volontat, li mandarián de fiuladas, d’agaches insistents, de comentaris sus l’aspecte fisic o pausarián de questions intrusivas.
 
Quant a ela, la consolessa màger de París, Anne Hidalgo, a mostrat sus Twitter sa solidaritat.
 
 
 

 

L’enjeu est grave: la liberté des femmes à circuler librement dans l’espace public.
Voilà pourquoi c’est une priorité
Verbalisation du #harcelementderue via amendes
Stages obligatoires par la loi pour les harceleurs
Campagne TV (4millions d’Euros) pour les témoins pic.twitter.com/86rivvwHGY

—  MarleneSchiappa (@MarleneSchiappa) 30 de juliol de 2018

 
 

Solidarité totale! Merci Marie Laguerre pour votre courage! Stop au harcèlement! https://t.co/7Tkd74mEUB

— Anne Hidalgo (@Anne_Hidalgo) 30 de juliol de 2018