Bandièra01 1180x150: Comuna de Tolosa

Actualitats

Artur Mas a Brussèlas: “Avèm fisança qu’Euròpa nos daisse pas tombar”

Lo president catalan diguèt en una conferéncia dins la capitala europèa que seriá un contrasens que l’UE excluguèsse una Catalonha independenta

Lo president de la Generalitat, Artur Mas, demandèt dimècres passat a Brussèlas que l’Union Europèa pòrte de solucions als païses que, coma Catalonha, vòlgan aver un estat independent dins una Union Europèa “fòrta e federala”. “Catalonha es una nacion que vòl contunhar d’èsser europèa e qu’espèra qu’Euròpa la daisse pas tombar”, çò declarèt Mas, que diguèt que se pòt pas passar jos silenci la volontat de las nacions. “Volèm pas bastir de frontièras nòvas. Tot lo nòstre projècte a una dimension europèa e a de sens dins l’espaci europèu”, çò apondèt.
 
Dins la conferéncia que faguèt al forum Friends of Europe, Mas parlèt de l’intencion de menar a tèrme un referendum o una consulta, o quitament de nòvas eleccions avançadas per poder far la consulta, pendent los quatre ans que venon. “La fasa finala serà un referendum o una consulta. Caldrà parlar abans amb lo govèrn espanhòl per s’acordar sus la data, l’an, lo biais de demandar, lo caractèr vinculant, etc. Çò decisiu es que i a un engatjament ferme per consultar los catalans dins los quatre ans que venon”.
 
Sul fach qu’una Catalonha independenta demòre dins l’Union Europèa, Mas diguèt: “Degun pòt pas dire d’òc, mas tanpauc degun pòt pas dire de non. Se las valors democraticas son pròprias de l’UE e se i a la determinacion d’agrandir l’Union, seriá logic qu’un país coma Catalonha, qu’aperten ja a l’UE, que complís los engatjaments, las nòrmas e qu’es contribuent net, i demorèsse. Perqué l’UE prendriá una decision de nos exclure e nos daissar defòra? Seriá un contrasens”.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Domergue Sumien Ais de Provença
4.

#3 Çò que ditz Faidit, es la veritat amb una logica implacabla. Lei fòrças politicas aranesas son pas interessadas per restar estacadas a Espanha. L'actualitat recenta o pròva: leis aranés se mòstran solidaris amb lo procès independentista catalan, tot en afortissent lo drech de decidir per Aran.

  • 3
  • 0
Faidit Comuns
3.

Los araneses an tant a far amb los espanhòls que los còrses amb los ucrainians.

Tant que i aurà pas una republica federala occitana, l'estat natural d'Aran serà Catalonha.

Per çò que concernis Catalonha, perqué aqueste país seriá juridicament ligat amb Canarias o Extremadura dins l'encastre d'Espanha e pas amb Lengadòc o Provença dins l'encastre d'un confederacion occitano-catalana?

  • 6
  • 0
Jaume Jose i Oranies Urgelh e endacòm mai
2.

Las causas començan a prene lo sieu luòc. O pas sieu, mas un luòc per cada causa.
Començam per respectar las províncias espanhòlas definidas per Manuel de Burgos l'an 1833 (abans que lo Congrès de Deputats espanhòl, 1834); a respectar la frontièra del Tractat del Pirenèus de 1659 malgrat lo primièr rei Borbó espanhòl Felip jurèt la copilació de leis l'an 1700 a Barcelona (copilacion que faguèt lo notariat Lluys de Peguera per l'escassença) que pas compreniá aquel Tractat e doncas jurèt protegir coma catalan l'actual Dept. Francés dels Pirenèus Orientals; a respectar lo rei que butèt Francisco Franco, la Constitucion que faguèron dejòs la legislacion franquista (de Franco) e un fum de causas mai.
Se fin finala Catalonia ven un nòu estat caldrà tornar a far tota la legislacion coma els catalans e araneses volèm.
Amb la legislacion actuala Catalunha a 40 comarcas e la Val d'Aran (amb legislacion pròpia).
I a causas que pensi que retornaran a l'estat d'abans dels Decrets de Nova Planta (1716) e altras que vendran de nòu.
Preteni pas que Aragon, València, Balears, Pirenèus Orientals, Sardenha, Sicilia e Napòls e quitament Montpelhièr tòrnen a venir dejòs lo rei de Catalonha e tampauc que s'arriba a respectar completament lo Tractat d'Utrech (1713) que Catalunha (granda) venga a èsser La Republica Catalana Protectorat del Reialme d'Anglatèrra (Anglaterra e lo Reialme d'Escòcia èra pas encara lo Reialme Unit).
Arribats a aquel punt (separacion de las Espanhas) Catalunha serà açò que los catalans e los europèus volgan (espanhòls compresos).

  • 1
  • 1
La Molièra Lo Molin de Baish
1.

Lo sénher Arthur Mas que vòu, dab rason,
Consultar los catalans per ua votacion
Tà saber se vòlen demorar en Espanha,
O se vòlen l’Estat de Catalonha.
Totun deus Aranés non parla pas briga.
Ne nse ditz pas quin lo vòt d’Aran l’obliga
En cas on los aranés e volerén està’s
ciutadans espanhòus e non pas catalans.

  • 4
  • 2

Escriu un comentari sus aqueste article