Aleksander H., un òme de 38 ans d’origina albanesa acusat a tòrt de l’atemptat de Niça del 14 de julhet de 2016, se suicidèt al començament de junh dins sa cellula de la preson de Fleury-Mérogis, près de París, çò rapòrta Libération. L’arrestèron en 2016 dins l’encastre de l’enquèsta sus l’origina de las armas de Mohamed Lahouaiej-Bouhlel. Despuèi alavetz Aleksander H. aviá totjorn refutat las acusacions. Segon aquel rapòrt, la santat del detengut se seriá fòrça deteriorada après un an de detencion.
 
Lo 5 de junh passat, dins un debat sus la prolongacion de sa detencion al palais de justícia, Aleksander H. anoncièt que voliá pas viure atal: “Me tròbi mal aicí, me vòli suicidar”, çò diguèt. “Es lo primièr còp que plori, aimi ben França. Los medicaments me meton pus mal. Ai un enfant de 3 ans, ma femna en Albania e ma maire.  Pensi pas que de me suicidar”, çò precisèt.
 
Quatre jorns pus tard, metèt fin a sa vida. Segon una confidéncia d’una font judiciària a Libération, l’acusacion e la jutgessa encargadas del dorsièr èran a dos dets de reveire las perseguidas car comptavan d’esparnhar a la victima los crimes terroristas per ne reténer sonque los delictes connèxes restacats a la fornidura de las armas.
 
Dins los jorns après sa mòrt, son avocada, Olivia Ronen, s’es batuda per que l’ambaissada d’Albania avance las despensas de repatriament del còrs e evitar, ansin, qu’Aleksander H. siá enterrat dins l’anonimat de la fossa comuna de la preson
de Fleury-Mérogis.