Bandièra01 capçalera  1180x150: Novestivada

Actualitats

L’IEO Lengadòc a licenciat sa directritz a causa del retirament de las ajudas publicas

Dins un comunicat l’associacion denóncia la supression de las ajudas publicas, e anóncia que contunharà son prètzfach coma poirà en demandant de sostens

A partir de setembre, de benevòls ensajaràn de tornar dobrir la botiga del centre de Besièrs qualques oras per setmana
A partir de setembre, de benevòls ensajaràn de tornar dobrir la botiga del centre de Besièrs qualques oras per setmana | Ruth Kaiser
Lo retirament de las ajudas publicas tòca ara l’Institut d’Estudis Occitans d’Erau (IEO 34). Après lo licenciament de la directritz de la FIMÒC e la liquidacion de Vistedit, ara es l’IEO 34 que licéncia sa directritz Ruth Kaiser a causa de la supression de las ajudas publicas. Dins un comunicat public mandat a lors sòcis, la còla de l’IEO 34 o planhon: “Los que bailejan ara las ajudas publicas regionalas que son normalament apeladas a sosténer la lenga e la cultura nòstra dins son espandiment e sa difusion, an pas comprés l’interés de manténer aquel emplec, ni mai la necessitat d’una botiga de difusion occitana (libres e produches derivats) dobèrta au còr de Besièrs, dins un quartièr popular”.
 
Dins son comunicat,  l’IEO 34 saluda e merceja per son òbra menada a bon tèrme Ruth Kaiser en manifestant sa desconsolacion, a de reconeissença envèrs totes los qu’an donat lor supòrt e explica cossí lo collectiu tendrà son activitat: “Ensajarem de tornar dobrir la botiga qualques oras per setmana a partir de setembre. La venda dels libres se farà tanben per correspondéncia, lo trabalh d’edicion va contunhar coma abans, bailejat per Florian Vernet”. Mentretant,  l’IEO 34 es a obrar amb lo centre cultural Lo Camèl per ensajar de trobar de solucions.
 
 
“Nos daissarem pas tòrcer”
 
“De tot biais, nos daissarem pas tòrcer per una politica lingüistica nècia que nos va totes plegar!”, çò ditz lo comunicat del temps qu’assegura que lo prètzfach “se va naturalament perseguir”.

 
 


 
fffff fffff
  Comunicat de l'IEO 34 a sos sòcis e associacions sòcias
 
Sèm malcorats de vos faire assaupre que sèm forçats de nos desseparar, per rasons economicas, de nòstra directritz e amiga Ruth Kaiser. Es de plànher, mas los que bailejan ara las ajudas publicas regionalas qu'an normalament vocacion de sosténer la lenga e la cultura nòstra dins son espandiment e sa difusion an pas comprés l'interès de manténer aquel emplec, ni mai la necessitat d'una botiga de difusion occitana (libres e produches derivats) dobèrta au còr de Besièrs, dins un barri popular.
Volèm saludar e grandmercejar Ruth per l'òbra complida e son abnegacion a la menar, de la creacion al manteniment d'aquel luòc de cultura e de convivéncia mas tanben detràs son taulièr, un pauc d'en pertot per lo país, de punta de clar a solelh colç, que vente, que plòga e que tomben de rabanèlas. Es una veirina sus un autre occitanisme que se tampa uòi. Ne sèm desconsolats e descorats.
 
Tenèm a mercejar e a rassegurar aqueles que fins a uòi nos an sostenguts, partenaris o personas, farem tot per esperlongar e manténer las collaboracions passadas. Lo CA de l'IEO 34, cotria lo Centre cultural lo Camèl, son a obrar amassa per ensajar de trapar solucions, mai que mai a travèrs una ajuda militanta e benevòla. (Se nos volètz faire prodèl es l'ora de faire pinchon!) Ensajarem de tornar dobrir la botiga quauques oras per setmana a partir de setembre. La venda dels libres se farà tanben per correspondéncia, lo trabalh d'edicion va contunhar come de per abans, bailejat per Florian Vernet.
 
La tinada de 2018 ven de paréisser, (3 de 4: lo quatren deuriá pas tardar) Traparetz aquí lo ligam per badar, faire vòstras causidas e crompas.
 
De tot biais, nos daissarem pas tòrcer per una politica lingüistica nècia que nos va totes plegar! Lo prètzfach de l'IEO 34 se va naturalament perseguir: ajuda als corses d'occitans e a las associacions sòcias. Lo site serà a cha pauc espolsat se nos volètz mandar las entresenhas necitas per aquò far, un blòg de comunicacion evenemenciala sus çò que portatz es a se metre en plaça. Tot serà a carrau per la dintrada.
 
Plan evidentament podrem pas téner pè a la bòla sens vosautres. Alara, vos mercejam per aqueles que l'an pas encara fach (tanben las associacions, ne manca fòrça aqueste an! Ont sètz?) de vos marcar a l'IEO per nos sosténer e faire abans.
 
 
Mercés
las còlas dau CA de l'IEO 34 e dau Camèl
 
   

 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Cairon Florentin d Albigés
23.

#22 La paura Susi Despès es estada plan contrariada de veire qu'avètz escarraunhat lo seu nom. Despès un nom plan occitan, çaquelà, que parla sulcòp a totes los qu'entendon la lenga, coma Delga, per exemple;
Després li poiria donar una origina catalana, çò qu'es pas , emai se, brava coma es , Susi es una persona fòrça "despresa" coma dison en Catalonha.
Aquò dich, per trobar virada a un prepaus, se cal pas acontentar d'arguments bufècs
La facilitat, solide, quand òm manca d'arguments es de s'amagar darrèr un escais.
Emai se per ensajar de far rire un boçin (l'afar èra pas ganhat, o sabiai, amb lo sens de l'umor plan conegut dels legeires del Jornalet) prenguèri la masqueta de Susi, me desvelèri 3 jorns après;
Compti sus vos per far çò mèmes dins los 3 jorns

  • 1
  • 0
Polonia Polonia disian !
22.

#21 Polonia del paure o sembla Polonia sauvada pel gong : Gerard Cairon = Susi Desprès. Susi Desprès = messorguièra. Gerard Cairon =messorguièr. Ara sabem . Compliments !

  • 0
  • 1
Gerard Cairon Florentin d Albigés
21.

#18 Avetz plan rason de puntar del det lo risc de fake new . Cal dire, e la coneissi plan, que Susi Despès (que voletz, amb un nom atal, se pensa que lo monde la van préne al serios!) es un pauc tròp estèrlucada, e sap pas mesurar las consequencias de sas intervencions . Sustot que dins la presentacion de la seu pseudò-letra - emai per los que mestrejan las subtilitats pus escuras de la lenga occitana- , res podia daissar pensar que s'agissia d'una craca .
Urosament que l'occitanisme compta pron de " nòstra Dòna del Bon Conselh", de monde regdes e serioses per tornar metre a plec los desvariats que se pèrdon dins lo monde de l'umor.
Se deuria crear una còla de comissaris politics de l'occitanisme corrèct per limitar aquelas derivas e benlèu, per exemple, donar son avis a la television catalana (TV3) sul dangièr d'una emission coma "POLONIA"( veire l'article de Matias Gibèrt del 27-6)
Gerard Cairon, aliàs Susi Despès

  • 11
  • 15
Lo raiòu Cevenas
20.

L'occitanisme sembla pas de saupre los mòts democracia, consultacion... Son las tèstas que ménon la dança. Lo restant dau còrs pòt ben se desbalar, dau moment que la tèsta demòra en naut e dinc son entegralitat...
Estonant que los estatuts pògon conténer un tau vici de forma, una tala absença de democracia consultativa. Aquela empega. Deu ben i aveire una rason.

Democracia tant coma cultura son portairas de comunicacion. Als que s'ocupèron de compausar los estatuts, podèm ben lurs demandar que comunícon emb dau monde associatiu, en nos bailent quauquas explicacions a perpaus dals estatuts...

Un còp mai... "Governem-nos" !

  • 3
  • 3
Manas Roquetianas
19.

#17 Autrament dich lo problèma de l'OPLO es que patis d'un vici de forma. Ara es mai clar. Es per aquo que calia començar. Gramaci per aquesta info.



  • 7
  • 0

Escriu un comentari sus aqueste article