Bandièra01 1180x150: Comuna de Tolosa

Actualitats

Argentina: lo Senat a refusat de legalizar l’avortament

Es atal qu’an decidit de manténer en vigor una legislacion de 1921

| @samcossar
Lo senat argentin a encalat aqueste dijòus lo projècte de lei per legalizar l’avortament dins un debat que s’es alongat de mai de dotze oras. La votacion finala es estada de trenta uèch vòtes contraris e de trenta un en favor. Es atal qu’an decidit de manténer en vigor una legislacion de 1921. Amb lo “non” dels senators, Argentina pòt pas tornar començar la procedura per legalizar l’avortament fins al 1r de març de l’an que ven, concretament al Congrès dels Deputats, qu’en junh passat aviá aprovat lo projècte.
 
Pendent tot la jornada de dijòus, de milièrs de personas s’acampèron a l’entorn del Congrès, en brandant de vestits verds, que son venguts lo simbòl de las protèstas per legalitzar l’avortament. I aguèt tanben de manifestacions, mens multitudinàrias, per rebutar l’iniciativa, sustot de religioses e de fidèls de la Glèisa catolica.
 
La decision del Senat es un còp fòrça dur per la campanha en favor del Drech d’Avortament Legal, Segur e Gratuit, que comencèt en 2006, e que defend que se pòsca avortar sens cap d’exigéncia particulara fins a la catorzena setmana de gestacion. La legislacion actuala o prevei solament dins qualques cases de violament e de risc per la santat de la maire.
 
En junh passat, los deputats argentins avián aprovada la despenalizacion de l’avortament. Foguèt una session cargada de tensions e que se perlonguèt de mai de vint oras. Lo resultat foguèt fòrça estrech: cent vint e nòu vòtes en favor, cent vint e cinc contra e una abstencion.

 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article