Bandièra01 1180x150: Comuna de Tolosa

Actualitats

crotz-tolosaCreated with Sketch.ProvençaProvençaPaís Marselhés

Sant Andiòu: an arrestats los autors presumits de l’atac racista de Borgonha

Los detenguts son meses en gàrdia a vista, sospechats de “temptativa d’assassinat” e “menaças de mòrt de caractèr racial”, entre d’autres

Divendres de ser se tenguèt a Beaune un rassemblament d’aperaquí 150 personas a l’iniciativa de SOS Racisme
Divendres de ser se tenguèt a Beaune un rassemblament d’aperaquí 150 personas a l’iniciativa de SOS Racisme | SOS Racisme
Arrestèron divendres passat en País Marselhés dos òmes sospechats d’èsser a l’origina de l’atac racista amb una arma de caça a Beaune (Borgonha) lo 30 de julhet passat que nafrèt sèt joves. Los detenguts foguèron meses en gàrdia a vista amb las sospièchas de “temptativa d’assassinat” e de “menaças de mòrt de caractèr racial”, entre d’autres, segon lo procuraire de Dijon.
 
Lo primèr detengut l’interpelèron a Sant Andiòu e lo segond restèt al volant de la veitura e ensaget de fugir en se ronçant suls policièrs e en nafrant a la camba un foncionari de la BRI de Marselha. L’arrestèron tres oras pus tard dins aquela meteissa comuna. Los detenguts, d’una trentena d’annadas, son originaris de Borgonha e èran ja coneguts de la polícia per de vòls amb violéncia.
 
Las interpelacions arriban doas setmanas après los faches.
 
 
L’atac racista
 
Los faches aguèron luòc dins la nuèch del 29 al 30 de julhet passat a Beaune (Borgonha), dins lo quartièr popular de Saint-Jacques. Una primièra altercacion aviá opausat de joves del quartièr als ocupants d’una veitura que passava. Après la discussion, la veitura forcèt lo passatge e en partissent un ocupant auriá proferit d’insultes racistas, segon de testimònis de la scèna. Tres oras pus tard, un autre veïcul arribèt al meteis endrech, lo passatgièr sortiguèt una arma de caça e tirèt sul grop.
 
Las camèras de susvelhança e las placas d’immatriculacion de las diferentas veituras utilizadas pels suspèctes an permés lor identificacion, e puèi lor arrestacion.
 
 
Racisme
 
Divendres de ser, se tenguèt a Beaune un rassemblament de dos cents personas a l’iniciativa de SOS Racisme. Mentretant, calguèt 11 jorns per que lo ministèri public considerèsse pas que foguèsse “un reglament de comptes”.
 
 
 




 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article