Bandièra01 capçalera  1180x150: Novestivada

Actualitats

L’òrdre alfabetic designarà lo nom d’ostal dels enfants de parelhs omosexuals

| Guillaume Paumier

Lo nom d’ostal dels enfants de parelhs omosexuals serà per defaut aquel del parent qu’aja la primièra plaça en l’òrdre alfabetic.


Segon d’informacions de Reuters, aquò es una de las disposicions ligadas al projècte de lei sul matrimòni omosexual, adoptat dimècres en conselh dels ministres.
 
La ministra de la Justícia, Christiane Taubira, precisèt tanben dins una conferéncia de premsa que los tèrmes “maire” e “paire” desapareisseràn pas del Còde civil amb aquel projècte de lei.
 
Una lei de 2002 dobriguèt la possibilitat de causir lo nom d’ostal pels enfants, en introdusissent una nòrma subsidiària que, dins lo cas de causida non exprimida, lo nom del paire i preval.
 
“Dins los parelhs omosexuals, la nòrma subsidiària deven que lo nom que prevaldrà serà lo primièr de l’òrdre alfabetic”, çò expliquèt Christiane Taubira.
 
L’objectiu es “d’evitar qu’entre los meteisses fraires e sòrres i aja inversion de noms o de noms desparièrs, levat se s’agís d’una causida explicitament enonciada”, çò apondèt.
 
La dobertura del maridatge als parelhs de meteis sèxe se fa segon lo mesme drech que pels parelhs eterosexuals: “res càmbia pas per las condicions del matrimòni e de l’adopcion”, çò expliquèt de son costat la pòrtavotz del govèrn, Najat Vallaud-Belkacem.
 
En responsa a un argument sovent emplegat pels opausants al tèxt, Christiane Taubira a explicat que los tèrmes “paire” e “maire” seràn mantenguts dins lo Còde civil.
 
“Lo maridatge eterosexual desapareis pas del Còde civil, per tant, los tèrmes de paire e maire desapareisson pas del Còde civil”, çò diguèt.
 
La fidelitat farà partida integranta del matrimòni per totes, çò apondèt la ministra de la Justícia, en suscitant una cèrta perplexitat al moment de la conferéncia de premsa. “Totes los dreches son dobèrts als parelhs de meteis sèxe, totas las obligacions tanben”, çò diguèt. “Demest aquelas obligacions, n’i a una que m’agrada fòrça, m’o cal dire particularament, es qu’en lo consentiment i aurà solide l’engatjament de fidelitat”, çò apondèt.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lutz
1.

E perqué pas ne daissar la causida als parents ? Omosexuals coma eterosexuals ?
E seriá un drame qu'aguèsson los dròlles de noms de familha diferents ? Es pas ja los cas dins las familhas recompausadas, o de nacionalitas diferentas ?

Me soveni d'una familha d'amics : suls 3 dròlles, un nasgut en Alemanha aviá lo nom de sa maire, los dus autres nasguts en França avián lo nom del paire. Tot lo monde se portava plan, mercés.

  • 3
  • 0

Escriu un comentari sus aqueste article