Es mòrt l’èx-secretari general de las Nacions Unidas Kofi Annan a 80 ans. Nascut en Ghana en 1938, recebèt lo Prèmi Nobel de la Patz en 2001 per son prètzfach “per un Mond mièlhs organizat e mai pacific”.
 
Annan foguèt un dels mediators internacionals que trabalhèt per daverar la dissolucion d’ÈTA, que capitèt fin finala lo 2 de mai passat. O celebrèt amb un messatge sus Twitter que l’acompanhava d’una fotografia d’un balcon ont apareissián una bandeiròla en favor del raprochament dels presonièrs politics e una bandièra independentista catalana. “Lo conflicte se resòlv rarament sonque amb las fòrças armadas soletas; la dissolucion d’ÈTA demòstra que lo dialòg politic es la clau per bastir la patz”, çò escriguèt. Aquela fiulada foguèt pus tard censurada.
 

 

Annan èra tanben president de The Elders, lo grop de caps mondials fondat per Nelson Mandela, que condemnèron la violéncia policièra en Catalonha a Aran lo 1r d’octòbre passat durant la tenguda del referendum d’independéncia; demandèron una solucion pacifica mejançant lo dialòg. 
 

It is with immense sadness that the Annan family and the Kofi Annan  Foundation announce that Kofi Annan, former Secretary General of the  United Nations and Nobel Peace Laureate, passed away peacefully on  Saturday 18th August after a short illness... pic.twitter.com/42nGOxmcPZ

— Kofi Annan (@KofiAnnan) 18 d’agost de 2018