Bandièra01 1180x150: Comuna de Tolosa

Actualitats

Perpinhan: de fotojornalistas catalans organizan una exposicion parallèla a "Visa pour l’image"

L’exposicion presentada per 42 fotojornalistas prepausa 155 imatges e cèrca de reagir al festenal oficial de fotojornalisme que ten pas cap d’exposicion suls eveniments viscuts en Catalonha

| Adrià Costa
Del 1r al 16 de setembre que venon, Perpinhan aculhirà, coma cada an, lo prestigiós festenal internacional del fotojornalisme nomenat "Visa pour l’image". L’eveniment, organizat dins la partida francesa de Catalonha, ten pas, totun, cap d’exposicion especifica sus la situacion politica al Principat de Catalonha a prepaus de son camin devèrs l’independéncia e de la repression que la patís de part de l’estat espanhòl. Es per aquò que quaranta dos fotojornalistas catalans se son organizats e an decidit d’agir.
 
Justament durant los jorns de "Visa pour l’image", la capitala nòrd-catalana albergarà una exposicion de 155 fotografias qu’illustran los faches politics que viu lo Principat de Catalonha dempuèi 2010 amb d’imatges de las grandas manifestacions e del referendum d’independéncia del 1r d’octòbre passat.
 
L’exposicion l’aculhiràn l’ostal d’edicion Trabucaire, lo bar Escalibar 25, la sala d’exposicions Chaman’Art12, la Brasseria del Castellet, Sant Vicenç e lo Casal de Perpinhan.
 
Lo director de "Visa pour l’image", Jean-François Leroy, expliquèt que si que lo festenal presentariá de fotografias sus la situacion politica del Principat de Catalonha mas que i auriá pas cap d’exposicion especifica pr’amor qu’avián pas trobat cap de trabalh amb pro de qualitat qu’expliquèsse “çò qu’a fach que los catalans revendiquen mai d’autonomia e mai d’independéncia”.
 
Après lo 16 de setembre, l’exposicion virarà en Catalonha Sud, e se vendrà los imatges per contribuir a la caissa de solidaritat dels presonièrs politics e dels represalhats.

 
 
 

 



abonar los amics de Jornalet
 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

Los que pòdon, cal anar vistalhar l'exposicion parallèla. Es lo melhor mejan de reagir a l'ostracisme de Visa.

  • 6
  • 0
PRADA
1.

Leroy : un francimand colonitzador qu'a res comprés a l'anhel dels catalans a salvar lor cultura e a auto-governar-se.
Pertot e sustot a Perpinhan, Leroy a de respectar los catalans e los jornalistas que fan un trabalh de tria per popularitzar la lucha del poble catalan.

Leroy torna a ton país : França e arresta de mespresar los catalans e los occitans ! Defòra !


  • 6
  • 1

Escriu un comentari sus aqueste article