Bandièra01 capçalera  1180x150: Novestivada

Actualitats

Catalonha: la batalha dels ribans jaunes

Dempuèi octòbre passat, lo riban auriòl es vengut lo simbòl de la revendicacion de libertat dels presonièrs politics en Catalonha e Aran. Lo simbòl contrària la drecha espanholista

Dempuèi octòbre passat, lo riban jaune es vengut lo simbòl per reclamar la libertat dels presonièrs politics en Catalonha e Aran. Plusors ciutadans ne pòrtan un sus lor vestit del temps que de ribans auriòls son afichats als balcons, a las fenèstras e per las carrièras de tot lo país. Al començament de l’estiu, de grops espanholistas, mai que mai restacats a l’ultradrecha, comencèron de traire de ribans jaunes e quitament d’agarrir los ciutadans que n’arboravan.
 
Lo partit de drecha espanholista Ciutadans protèsta contra aqueles ribans. Pretendon que son de simbòls politics qu’ocupan l’espaci public, e encoratjan lors militants a retirar los que serián trobats per carrièras. An quitament pagat un avion publicitari que subrevòla las platjas del país en demandant al mond que lèven los ribans auriòls.
 
E mai se las agressions fisicas se produson normalament del costat espanholista que trai los ribans, i aguèt a Barcelona una agression un pauc dobtosa e Ciutadans ne profechèt. Un òme, que sembla d’èsser racista, batèt una femna russa per una discussion sul rambalh que fasián sos enfants. Lo marit de la femna èra militant de Ciutadans, e sos principals caps politics publiquèron suls rets socials que s’agissiá d’una agression independentista e mai que l’òme aviá trencat lo nas de la femna. Publiquèron d’imatges falses per o illustrar.
 
Se convoquèt dimècres passat una manifestacion per protestar contra aquela agression. Mas durant l’acamp, de manifestants batèron a còps de ponh un jornalista de la television de Madrid qu’enregistrava amb una camèra. Diguèron que l’avián pres per un jornalista de TV3, la television de Catalonha.
 
Dins la manifestacion i aviá de mond de Generacion Identitària, lo partit ultradrechista francés, qu’èra vengut sosténer Ciutadans.
 


 
Alella: un imatge que resumís çò que se passa
 
Aquel meteis 29 d’agost pel matin, los dos principals caps de Ciutadans, Albert Rivera e Inés Arrimadas, anèron dins la vila d’Alella per retirar personalament los ribans jaunes davant las camèras de qualques cadenas de television qu’eles avián convocadas.
 
Puèi faguèron una conferéncia de premsa, e a aquel moment se prenguèt un imatge que mòstra çò que se passa al país. Mentre que los dos caps de Ciutadans parlavan a las televisions, se vesiá al rèireplan que totes los ribans auriòls que los venián de levar èran tornarmai en plaça. De femnas del vilatge èran a los tornar metre quitament sens esperar que lo passacarrièra espanholista se n’anèsse.
 
Enfin, quand partiguèron, i aviá a Alella lo doble de ribans jaunes qu’abans l’arribada de Rivera e Arrimadas.
 

 

"Trai-me aqueste!"
 
En seguida es apareguda suls rets socials una campanha amb l'etiqueta espanhòla #RiveraQuitameEste (Rivera, trai-me aqueste) que demanda al cap de Ciutadans que venga retirar lo riban jaune de l'usatgièr que pòsta lo messatge. L'etiqueta es venguda de mòda sus Twitter per tot l'estat espanhòl e endacòm mai.
 
Los messatges son mai que mai ironics e revendicatius e defendon la libertat d'expression per poder reclamar liurament la liberacion dels presonièrs politics.
 
E mai, dins divèrsas vilas coma Madrid, Pampalona, Bilbao, Valéncia e Palma, de mond se son amassats per afichar de ribans jaunes per carrièras.



abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Lo raiòu Cevenas
6.

Amai siágue un afaire catalan quela istòria de ribans jaunes, nos pertòca de mai d'un biais, nautres occitans. Simboliza una luta fòrta e pacifica au còp per la libertat de presonièrs politicas enjustament embarrats, per la libertat d'un pòple que vòu decidir, de-per-el, d'aquò bòn per el a mai d'un nivèl. Tot aquò d'aquí es normau e de-mo-cra-tica.
Operacion simpla, sans grand engatjament e qu'esija pas gaire d'esfòrç. Saguem solidaris. Procurem-nos de teissut jaune e decopem-lo en ribans. Estaquem-los au mobilièr urban qu'atraparem per las carrièiras de nòstres liòcs de vida costumièrs. Totas las associacions que milíton per nòstra lenga e nòstra cultura poiriáun consacrar un part de lur budgèt (aquò lurs costarà pas grand causa !) per achaptar de teissut jaune au mercat (fai pas besonh que siágue de seda !). Ne'n florirà de ribans jaunes se tot lo monde se bota a l'òbra ! Que chascun envie l'idèia a sos contactes e l'IEO nacionau de n'assaventar totas las seccions regionalas que trasmetràn pièi a las associacions localas. Las ràdios mai pòdon relaiar lo messatge.
Pasmens, fai besonh precisar qu'una accion d'aquesta mena fonciona se i a una conciença adejà bien establida e fonsa de la causa sostenguda, emb d'una reclama bien presenta e dau messatge clar dinc los mèdias locaus e, mai que mai, sus los malhums sociaus. Autrament... l'accion chorrarà sans aveire agut lo ressòn qu'esperaviam.

  • 7
  • 0
Mossur MTD
5.

Ieu auriái dich : Tira-me aquel d'aquí !
Per fin de bien precisar que s'agís d'aquel del messatge (= este).

  • 1
  • 0
Pierre TERRAL
4.

#2 Comprenètz pas lo "nòu occitan" ? En patoès auriam dich "Tira-lo me" o ,coma escrivètz,"Tira-me aquò".

  • 4
  • 4
Gerard Joan Barceló Pèiralata
3.

#2 E ben precisament, s'agís de mostrar a Albert Rivera un riban especific que cadun presenta. Per l'escometre.

Aprofièchi la responsa per deplorar l'abséncia dels occitans sus Twitter...

  • 1
  • 0
Suquet
2.

Me demandi se « trai-me aqueste » coma eslogan es una bona revirada.
Ieu auriá dich puslèu : « tira-me aquò/trai-me aquò », o encara tanplan : « tira-me aquel trast ».
Parli pas aquí d’una traduccion literala mas del sens.
Per çò que, naturalament que « trai-me aqueste....e daissa los autres », es de bona lenga ; dins un contèxte de causida (entre dos ribans), e de diferenciacion.
O alara compreni pas pus res, çò qu’es possible tanben.

  • 5
  • 0

Escriu un comentari sus aqueste article