Bandièra01 1180x150: Comuna de Tolosa

Actualitats

Manifestacion a Perpinhan per defendre l’escòla en catalan, pendent la Jornada de Catalonha Nòrd

| @PerGarriga
La Comission 7 de novembre (que se referís a la data de la signatura del Tractat dels Pirenèus, ont s’incorporèt la partida nòrd de Catalonha en França, en 1659) organizèt dissabte passat los actes de la Jornada de Catalonha Nòrd a Perpinhan. Coma totjorn, se manten la revendicacion d’escafar lo Tractat del Pirenèus, “per manifestar la volontat de bastir un futur comun amb la rèsta dels Païses Catalans”, mas aqueste còp, los catalans manifestèron per defendre l’ensenhament en catalan e “per denonciar las agressions contra la lenga catalana dins tot lo territòri catalan”.
 
Las activitats comencèron a 15h sus la Plaça del Castellet amb l’activitat interactiva “Escòla a la carrièra”, a la carga de la Brigada d’Intervencion Poetica. Una ora puèi, partiguèt d’aquel endrech la manifestacion pel centre vila, que s’acabèt a 19h30 amb una marcha de tesas dempuèi lo Castellet fins a l’Ostal Musical. Dins aquel espaci, tre 20h30, se faguèt l’abitual concèrt de la jornada amb Dekrèpits, Ebri Knight e un tribut rosselhonés a la musica jamaicana.
 
 
Sesilha plenièra del secretariat nacional de l’ANC a Bao
 
En escasença de la jornada nòrd-catalana, pel primièr còp, l’Assemblada Nacionala Catalana (ANC) faguèt dissabte la sesilha plenièra de son secretariat nacional en Catalonha Nòrd, dins la sedença de l’associacion Aire Nou de Bao. La sesilha plenièra se faguèt excepcionalment ailà a la demanda del movement Catalonha Nòrd per l’Independéncia.
 
De ser, l’ANC participèt tanplan a la manifestacion de commemoracion del Tractat dels Pirenèus a Perpinhan, darrièr la bandieròla de Catalonha Nòrd per l’Independéncia, que disiá “Catalonha Nòrd es tanben Catalonha!” 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escriu un comentari sus aqueste article