La cauma generala se fa uèi dins l’Estat espanhòl, en Portugal, Grècia, Chipre, Malta e Belgica; en Itàlia se fa un arrèst de quatre oras. Los sindicats d’aqueles païses decidiguèron de soscriure a la crida de la Confederacion Europèa dels Sindicats (CÈS), que convoquèt en octòbre passat una jornada de mobilizacions contra l’austeritat e las reformas estructuralas, en forma de cauma generala qu’aurà coma domeni d’accion lo sud d’Euròpa.

La convocacion de la CÈS denóncia las reduccions budgetàrias dels estats membres de l’UE e lo desmantelament del modèl social europèu, mas non precisa que las protèstas devengan de caumas generalas. Aital, lo document permet de causir entre de manifestacions, de rescontres o d’autras accions.
 
Aquela mobilizacion europèa vòl far comprene que lo movement sindical europèu a d’alternativas als problèmas economics, socials e politics grèus que viu Euròpa e que “meton en risc la quita existéncia de l’UE”. La CÈS considèra “qu’es urgent de rectificar las politicas d’austeritat e de las remplaçar per d’autras, que preferiscan, coma primièras prioritats, la promocion de la creissença economica e de l’emplec e mai la solucion de la crisi del deute sobeiran dels estats”.
 
A l’ora d’ara, la CÈS es integrada per 85 confederacions sindicalas e 10 federacions industrialas de 36 estats europèus, que demest eles i a Belgica, França, Alemanha, lo Reialme Unit e Itàlia.