Bandièra01 1180x150: Comuna de Tolosa

Actualitats

Carcassona. Barrament de Pilpa: 123 salariats licenciats o reclassats endacòm en Euròpa

| © Los Ciutadins

Segon d’informacions del sindicat CGT, los 123 salariats de l’usina Pilpa de Carcassona, filiala de la granda entrepresa estatsunidenca de glacets R&R, an recebut, o son a recebre, las lors cartas de licenciament, e qualques unes recebràn d’ofèrtas de reclassament endacòm en Euròpa.


Lo barrament de Pilpa foguèt anonciat lo 5 de julhet passat, nòu meses après lo sieu salvament pel grop R&R. Los salariats pensan de denonciar a la justícia lo plan social. “L’usina es tot plen viabla amb la crèma glaçada. Nos an comprats per prene la marca, las nòstras licéncias per los glacets Oasis e Disney, e se desbarrassar d’un concurrent” çò declarèt Rachid Aït Ouakli, elegit CGT al comitat d’entrepresa.
 
Pilpa aperteniá a la cooperativa lachièra 3A abans d’èsser venduda a la societat americana. Al moment del salvament, en 2011, l’entrepresa carcassesa comptava 156 salariats e un temps plen equivalent de 80 interimaris, segon lo sindicat. Per contra, “trobar ara un emplec serà malaisit perque 45 personas an mai de 50 ans”, çò apond Aït Ouakli.
 
Dins la darrièra reünion, la direccion de l’entrepresa prepausèt de reclassaments en Polonha, Alemanha, Itàlia o al Reialme Unit, del temps que justificava lo barrament per “salvagardar la competitivitat” del grop.
 
Los salariats licenciats auràn nòu meses de vacanças per organizar lo lor reclassament e d’indemnizacions entre 5000 e 30 000 èuros en foncion de lor ancianetat dins l’entrepresa. 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article