Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc BasCarcassés

Sabors e nòças per dos rendètz-vos audencs

L’Institut d’Estudis Occitans d’Aude es implicat dins dos rendètz-vos culturals bèls en aqueste mes de novembre: la Setmana de las Sabors a Puègnautièr (del 12 al 15 de novembre) e una serada-espectacle e un estagi amb lo parelh Corbefin-Marsac (23 al 25 de novembre, a Cavanac e Carcassona).


Setmana de las Sabors a Puègnautièr (12 al 15 de novembre)
 
Ongan, la Setmana de las Sabors s’interessarà a las solanacèas. Aquò es una granda familha: 98 genres e 2700 espècias. Nos limitarem doncas mai que mai a las patanas, a las merinjanas e als pebrons que seràn l’objècte d’una mòstra originala.
 
Primièr rendètz-vos a Puègnautièr: diluns 12 de novembre, a 7 oras del vèspre (sala de la Tor) per una lectura-estrena amb de tèxtes en occitan, francés, castelhan…
 
Dimècres 14 de vèspre (15h, Na Loba), Alan Roch dirà qualques istòrias per manjar e tastar pels pichons e pels grands: Patana, Patanon e Pataneta.
 
A 6 e mièja del vèspre, a l’Ostal Sirventés (79, la Trivala a Carcassona), se debanarà un obrador dobèrt d’occitan consacrat a las solanacèas.
 
Dijòus 15, a 6 e mièja del vèspre (Na Loba), l’etnobotanista Josiana Ubaud balharà una conferéncia pivelanta suls “Viatges lexicals e geografics de l’ortalalha”. Un sopar tot en solanacèas clavarà la setmana (en seguida de la conferéncia; 12 èuros, sus inscripcion: +33(0)4 68 25 19 78 o ieo11@ieo-...)
 
La Setmana de las Sabors es organizada per l’Institut d’Estudis Occitans d’Aude, lo Cercle Occitan del País de Carcassona amb lo sosten de la Comuna de Puègnautièr, del Conselh departamental d’Aude e de l’Ofici Public per la Lenga Occitana.
 
Doas ràdios participan al projècte: RCF-Pays d’Aude amb la difusion de 3 cronicas Als 4 vents (diluns 29 d’octòbre, 5 e 12 de novembre 18h30; en redifusion: dissabtes 3, 10 e 17 de novembre, 10 h; disponiblas en podcast) e Ràdio Lenga d’Òc Narbona amb las cronicas “Patanas e merinjanas” en multidifusion del 5 al 16 de novembre.
 
 
De nòças gasconas a Cavanac, lo divendres 23 de novembre
 
Lo divendres 23 de novembre, de l’autra part de Carcassona, a Cavanac (fogal, 20h30; participacion liura) auretz l’escasença de seguir l’espectacle musical de Pèire Corbefin e Felip Marsac: Guilhèm e Margalida se maridan. Profeitatz-ne que los dos companhs an decidit d’arrestar las viradas a la fin de l’an (de notar qu’aqueste espectacle serà tanben presentat a Marmanda, dijòus 22 de novembre) .
 
L’espectacle mescla projeccion, raconte en francés e cants en lenga nòstra per seguir los dos eròis del rescontre fins als 3 jorns de las nòças. E òc, èra una plan bèla e granda fèsta!
 
La tòca es de faire descobrir la riquesa dels usatges e rituals ligats al maridatge cò dels païsans gascons al sègle 19, de faire ausir los cants qu’acompanhavan los divèrses moments del maridatge. Atal, 11 cants en occitan de Gasconha son prepausats: “Bonsoar mèste de la maison”; “Lo caçacan”; Lo pòrtalhèit”; “Lo pòrtacorona”; “Nòvia, ta mair te plora”; “Sortitz, sortitz, los ahumats!”; “N’ai traversat nau lanas”; “La nòvia a nau brilhants”; “Anueit toqueram”; “Quan son pair l’a maridada”; “Lo torin”.
 
De mai, los dos companhs animaràn d’obradors de cant tradicional los dissabte 24 e dimenge 25 de novembre a Carcassona a l’iniciativa de l’ensemble vocal Canti-Canta, partenari de l’IEO-Aude per aqueste rendètz-vos.
 
 
 
 
Alan Roch

 
 
Per ne saber mai: ieo11@ieo-oc...; +33(0)4 68 25 19 78.
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
1.

Per l'estagi de cant amb Pèire Corbafin e Felip Marsac, las inscripcions son dobèrtas.
Se debanarà a Carcassona, 10, carrièra A. Guiraud, lo dissabte 24/11 (14h30-18h30) e lo dimenge 25/11 (10h30/13h e 14h/17h30 ; repais tirat de la saqueta a 13h). Còst : 50 €.
Per se marcar :  pascalemoreno@hotmail.fr
Inscripcion de mandar a "Association Canti Canta, 10 rue Alexandre Guiraud, 11 000 Carcassonne" ami las vòstras indicas (Nom pichon nom , adre!ças electronica e postale, n° portable) e un chèc d'avanças de 15€ .

  • 1
  • 0

Escriu un comentari sus aqueste article