Bandièra01 1180x150: Comuna de Tolosa

Actualitats

Lo grand degalhatge de la fusion de las regions

France Culture publica una enquèsta que mòstra que la fusion de las regions francesas a menat a de resultats opausats als estalvis promeses

| La Région Occitanie / Pyrénées-Méditerranée
La reforma de las regions de l’estat francés en 2015, pensada oficialament per far d’estalvis, seriá un grand degalhatge segon una enquèsta que la ven de publicar France Culture. Dins un reportatge fach per la jornalista Cecila Hautefeuille (qu’avèm agut l’onor de sa collaboracion dins Jornalet) entitolat “Lo grand degalhatge de la fusion de las regions”, lo document mòstra una nauça dels còstes de locacion de salas per las reünions, de despensas de desplaçaments qu’espetan, de primas dels agents que creisson...
 
 
La region qu’a pres lo nom d’Occitània ten lo còst per abitant pus naut
 
L’enquèsta es facha dins la region qu’a pres lo nom d’Occitània, la segonda pus granda de l’estat francés, ont lo còst per abitant es lo pus naut.
 
Aquela region, d’aperaquí 6 milions d’abitants, es nascuda de la fusion entre Lengadòc-Rosselhon e Miègjorn-Pirenèus. Sa capitala es situada a Tolosa, mas per desdamatjar Montpelhièr, qu’a perdut l’estatut de capitala regionala, s’es decidit que totas las sesilhas plenièras dels elegits se debanen aquí, quatre còps per an, çò que fa ja pojar las despensas, mai que mai se prenèm en compte que l’ancian emicile montpelhierenc es tròp petit per aculhir los actuals 158 conselhièrs regionals, e aquelas sesilhas se tenon al Pargue de las Exposicions ont cal montar e desmontar quatre còps per an totas las installacions: moqueta, bugets, sètis, burèus, climatizacion... L’assemblada plenièra de junh de 2017 costèt 137 170 èuros, sens comptar los còstes de noiridura.
 
Segon lo reportatge d’Hautefeuille, la presidenta regionala, Carole Delga, a entamenat de trabalhs per agrandir los emicicles, perque lo president francés, Emmanuel Macron, a daissat entendre que lo nombre d’elegits poiriá demesir.
 
Los còstes de transpòrt dels elegits son tanplan fòrça nauts, se prenèm en compte que i a d’elegits que fan uèch oras de trajècte per tres oras de reünion. En consequéncia, France Culture afirma que lo nombre de quilomètres efectuats pels agents en 2016 aumentèt d’un 78% per rapòrt a 2015.
 
D’autras consequéncias de la reforma de las regions son l’aumentacion non solament de la massa salariala per armonizar las primas dels foncionaris territorials, mas tanben de las indemnitats dels elegits regionals. E mai los còstes de transicion, los cambiaments de lògos, etc. Per exemple, lo novèl abilhatge dels trens a costat dètz milions d’èuros a la region Nauts de França.
 
L’enquèsta d’Hautefeuille s’acaba amb una “constatacion crusèla”.  Las regions son mai costosas qu’abans la fusion, de mai an pas aquerit la poténcia que lor poiriá permetre de pesar dins lo concèrt europèu. Per exemple, l’ensemble dels budgets de las regions de l’estat francés representa 30 miliards d’èuros. “Una gota d’aiga comparada a la sola Catalonha [e Aran], en Espanha, que pesa 23 miliards d’èuros”, çò conclutz l’article.
 
 
 
 
France Culture: Le grand gaspillage de la fusion des régions per Cécile Hautefeuille e Cellule investigation de Radio France
 
 
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Escrivanèta
3.

Tre la debuta aquel oximòr de decentralizacion jacobina fabricaira de"grandes régions" ( totjorn estrechament infèudadas a Paris que se reserva atal lo burre e l'argent del burre.. ) èra una engana de las grandas. E dire que i a agut al nòstre quauques arlèris per s'estrambordar d'aquesta farfantèla !

  • 6
  • 0
francesc palma
2.

Lo govern de extrema destra que pot fer ? Res de bon, desastre darrera desastre.

  • 6
  • 0
Pitaluga
1.

E lo degalhatge d'argent per Radio France que passa de cantaires sens chuc ni muc coma de sansònhas duscas a los gravar dins los caps, que fa venir aquels invitats ninòis que sabon pas de qué parlan se parlan pas de lor embonilh, qu'emplèga d'animators que se prenon per de jornalistas, que s'inventa de bestièsas coma lo "Mouv"...? Ai vist un film documentari sus Radio France que se vòl un imne al seriós de l’ostal e que de fach mòstra de preparacions e d’enregistraments d’emissions que còstan la pèl del cuol per un resultat benlèu plan polit per çò qu’es de la presentación mas d’un interés mediòcre quant al contengut. E qué dire de las Radios bleues, que se pretendon de proximitat et boicotejan la cultura nòstra? Piéger: quand te passejas per Camarga, entre RB 34, RB 30, RB 13, e te sabi ieu quinas autras Radio bleue que t'empobolan las ondas te còsta de trapar Ràdio Lengadòc.

  • 15
  • 19

Escriu un comentari sus aqueste article