Bandièra01 1180x150: Comuna de Tolosa

Actualitats

Tanzania: caça de las bruèissas contra las personas omosexualas

S’acusa los activistas LGTBI de promòure l’omosexualitat e se demanda als ciutadans que los identifiquen e los denóncien. Los activistas riscan de longas penas de preson

| http://www.cristianosgays.com/
Lo collectiu LGTBI de Tanzania son en grèu perilh. Paul Makonda, comissari regional de Dar es Salaam, anciana capitala del país, a creat una fòrça especiala per identificar e punir las personas omosexualas, que prevei una persecucion e de longas penas de preson, çò rapòrta The Guardian.
 
Dins una entrevista publicada sus YouTube, Makonda encoratja los ciutadans a la delacion contra los gais. E mai, diguèt dins una conferéncia de premsa qu’aviá recebut mai de 5700 messatges de ciutadans que delatavan mai d’un centenat d’omosexuals.
 
“Fan de recèrcas dins los ostals. Es quicòm d’òrre e cada còp es piéger. Fòrça mond quitan la vilan. Fugisson. Van contra los activistas en allegant que fan promocion de l’omosexualitat, nos devèm amagar”, çò rapòrta al jornal britanic un activista LGTBI que preferís pas de dire son nom. Un autre activista apond que la vila viu una “sason de caça dels gais” e rapòrta que se publica de listas de noms suls rets socials per “forçar lo mond al coming out“. “Podètz pas imaginar çò que fa aquò a las gents e las famihas”, çò apond.
 
De son caire, lo Ministèri dels Afars Exteriors de Tanzania a soslinhat que la campanha de Makonda representa pas que sa vision e non pas la posicion oficiala del Govèrn. Ça que la, las autoritats an sostengut en divèrsas escasenças de mesuras omofòbas dempuèi que John Magufuli accediguèt a la presidéncia en 2015 amb un programa contra la corrupcion.
 
 

 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
1.

La libertat e la democràcia es respectar a las personas en tots los sieus aspectes. Non hi valen excusas

  • 1
  • 0

Escriu un comentari sus aqueste article