Bandièra01 1180x150: Comuna de Tolosa

Actualitats

Aran: los estudiants de segondari an fach una cauma feminista

Lo nòu Sindicat d'Estudiants d'Aran demanda de mesuras per l'egalitat de genre e l’abrogacion de la lei estatala d'educacion

| Aué TV
Un cinquantenat d’estudiants de l’Institut d’Aran participèron dimècres passat a una jornada de cauma per exigir l’egalitat dins l’educacion e protestar contra lo sexisme a l’escòla. L’institut (equivalent al collègi e al licèu de l’estat francés) jonhiá atal la jornada de cauma feminista que se fasiá dins los establiments de segondari de Catalonha, per revendicar tanben l’abrogacion de la lei de reforma educativa (LOMCE segon sa sigla en espanhòl) impausada pel govèrn de Rajoy e qu’es totjorn en vigor.
 
Las principalas revendicacions dels estudiants èran “era metuda en marcha d’ua matèria d’educacion sexuau inclusiva” sus l’egalitat de genre e tanben una presa de consciéncia davant lo “collectiu LGBT”, çò declarèt a Aué TV un representant del sindicat d’estudiants que son sèti es a Vielha, en precisar qu’aquela matèria deu èsser “avalorabla e obligatòria”. En mai d’aquò, demandan que de “mesures disciplinàries contra aqueri professors o alumnes que mantien actituds masclistes e repressives”.
 
La cauma es arribada en Aran gràcias a la nòva delegacion aranesa del Sindicat d’Estudiants. “Ei important que totòm ac organize mès sustot nosati perque pensi qu’estam en ua edat que pensi que ja podem començar a pensar e crear per nosati madeishi sense depéner dera opinion de bèth un”, çò precisava a la television aranesa un pòrtavotz del movement.
 
Lo Sindicat d’Estudiants aranés demanda ara mai d’engatjament dels estudiants araneses, mai que mai dins una jornada ont solament cinc gojats, demest una cinquantena de gojatas, an manifestat.
 
 

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
1.

Es que i a de trabalh sus aquel sicut en Espanha ont val mai violar una jove (6 ans de preson per "La Manada") qu'aver d'idèas que geinan lo rei, los partits corromputs e lo grand capital complicis d'un nacionalisme destimborlat (25 ans de preson demandats pels republicans catalans).

Òsca als joves d'Aran!

  • 7
  • 0

Escriu un comentari sus aqueste article