Bandièra01 1180x150: Comuna de Tolosa

Actualitats

Segon la CIA, lo prince eiretièr d’Arabia Saudita auriá comanditat l’assassinat de Khashuqji

L’ambaissada saudita dels Estats Units auriá recomandat al jornalista de far sas demarchas per se maridar al consolat d’Istambol

| The White House
La CIA crei que lo prince eretièr saudian, Muhammad Bin Salman, comanditèt l’assassinat del jornalista Jamal Khashuqji (sovent transcrich Khashoggi). Segon los servicis secrets estatsunidencs, lo jornalista auriá contactat l’ambaissador saudian als Estats Units per obténer los papièrs per se maridar, e l’ambaissador, qu’es lo fraire del prince eiretièr, li auriá respondut que faguèsse las cambadas al consolat d’Istambol, qu’aviá la garentia del prince que tot se passariá plan, çò rapòrta The Washington Post, jornal que Khashuqji n’èra collaborador.
 
En mai d’aquò, lo jornal estatsunidenc rapòrta que la CIA interceptèt, après l’assassinat de Khashuqji, una telefonada del consolat saudian a Istambol dins la quala un oficièr de seguretat apelava un assistent del prince Bin Salman per li raportar que l’operacion s’èra menada a bon tèrme.
 
Segon aquelas informacions, la CIA auriá assabentat del crime lo govèrn dels Estats Units, comprés lo Congrès.  Pasmens, segon lo govèrn saudian, lo prince Muhammad Bin Salman es pas brica implicat dins l’afar.
 
The Washington Post publica aquelas informacions en anglés e tanben en arabi.
 
 
L’ambaissada saudiana rebuta aquelas informacions
 
De son costat, l’ambaissada d’Arabia Saudita o a desmentit. “Las afirmacions d’aquela suspècta avaloracion son falsas. Cal escotar, e contunham d’o far, las divèrsas teorias sens veire la basa principala d’aquelas especulacions”, çò a dich.
 
 
Estats Units, Turquia e l’Arabia Saudita vòlon jutjar los culpables
 
Lo vicepresident dels Estats Units, Mike Pence, a dich que los assassins de Khashuqji deuràn respondre de lors actes davant la justícia estatsunidenca. Mas las autoritats turcas demandan que l’Arabia Saudita extradisca los responsables devèrs Turquia per que i sián jutjats.
 
Pasmens, lo ministèri public del reialme saudita           afortiguèt dijòus passat que demandava la pena capitala per cinc suspèctes del crime, en afirmant que lo prince Bin Salman i aviá pas res a veire.
 
Cossí que siá, sembla qu’es cada còp pus complicat que Muhammad Bin Salman pòsca eiretar lo tròn del reialme saudita.
 
 
An pas trobat l’ADN
 
Lo ministèri public de Turquia afirma qu’an pas trobat d’ADN de Khashuqji al consolat d’Istambol ni mai a l’ostal del cònsol, e ne conclutz doncas que lo poirián aver espeçat dins una veitura.
 
 
 

 

 

 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
3.

Què es pitjor la cia o la monarquia d'Arabia Saudita ? Tot dos.

  • 2
  • 0
Pitaluga
2.

Paure trumpetaire! Es trist pels desavènis de son amic, lo rei del petròli. Mai que pels mòrts de Califòrnia.

  • 3
  • 0
Gèli Grande Lairac d\'Agenés
1.

"Segon la CIA Lo prince eiretièr d'Arabia Saudita auria comanditat l'assassinat de Kashugji"
En occitan aquò s'apèla "parlar coma lo devinaire de Cucuron" o en francés "enfoncer une porte ouverte"

  • 11
  • 0

Escriu un comentari sus aqueste article