Bandièra01 1180x150: Comuna de Tolosa

Actualitats

Benoît Hamon demanda la liberacion dels presonièrs politics catalans

“Espanha es pro fòrta per far la causida de la democracia e liberar los politicians catalans”, çò a dich

| Marion Germa
Lo cap del partit Generacion·s e èx-candidat socialista a la presidenciala francesa, Benoît Hamon, a demandat la liberacion dels presonièrs politics catalans. “Espanha es pro fòrta per far la causida de la democracia e liberar los politicians catalans”, çò a dich dins una entrevista a la ràdio Equinox en tot assegurar que “los politicians catalans seràn melhor dins lo debat public qu’en preson” e qu’eles “representan pas cap de perilh per la seguretat interiora espanhòla”.
 
Hamon a assegurat qu’el es pas “un independentista catalan” e mai s’a reconegut que “Catalonha dins lo passat foguèt una nacion”.
 
 
A prepaus de Manuel Valls
 
“Es pas lo procès independentista qu’a favorizat la candidatura de Manuel Valls a Barcelona, mas sas malescasudas en França”, çò a dich tanben lo que ganhèt las primàrias del Partit Socialista per l’eleccion presidenciala. De tot biais, Hamon crei que l’actuala consolessa màger de Barcelona, Ada Colau, es “mai capabla per dirigir Barcelona que Manuel Valls”.
 
Podètz escotar l’entrevista tota en seguida:
 

 
 
Lo ròtle “vergonhós” de l’Union Europèa
 
Hamon critiquèt ja en octòbre de l’an passat lo ròtle “vergonhós” de l’Union Europèa a prepaus de la situacion en Catalonha e Aran. Dins una entrevista emesa sus France Inter, Hamon denoncièt que los caps europèus sostenguèsson lo president espanhòl, Mariano Rajoy, sus l’aplicacion de l’article 155 de la Constitucion espanhòla. “Es pas la bona solucion”, çò precisèt.
 
Segon Hamon, la situacion en Catalonha e Aran èra “una crisi politica e institucionala” e caliá de “dialòg”. “Lo refús del dialòg de part del govèrn espanhòl e dels dirigents europèus a menat a l’androna actuala”, çò ajustèt en remarcant qu’alara tot dependiá “de las decisions de Carles Puigdemont”, lo president de la Generalitat de Catalonha. A aquela epòca, degun podiá pas imaginar que los elegits catalans finirián en exili o en preson.
 

 
 
 
 
 




abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
2.

Que hi haja presos politics en un país qu' es diu democràtic es coma l'arbre talhat per la soca, lo filh qu' entra a raubar a la casa del paire, el judes vestit de Santa Teresa, lo jutge venut als franquisme.

  • 2
  • 0
Franc Bardòu
1.

Espanha es pro fòrta per far la causida de la democracia e liberar los politicians catalans ?

A mon umil punt de vista, non s'agís d'una question de "fòrça" mas de color politica, non pas aficada, mas efectiva : per liberar los politicians e associatius catalans, cal èsser democrata, non pas franquista.

  • 6
  • 0

Escriu un comentari sus aqueste article