Bandièra01 capçalera  1180x150: Novestivada

Actualitats

La societat ferroviària olandesa pagarà d’indemnitats per aver menat de mond dins los camps nazis

Nederlandse Spoorwegen ganhèt alavetz l’equivalent de 2,5 milions d’èuros per menar 102 000 personas dins los camps de concentracion

| Frits Pentenga
Nederlandse Spoorwegen (NS), la societat estatala dels camins de fèrre dels Païses Basses, indemnizarà los subrevivents dels camps nazis que foguèron menats dins sos trens e lors familhas, çò rapòrta The Guardian. NS ganhèt alavetz l’equivalent de 2,5 milions d’èuros per menar 102 000 personas dins los camps de concentracion.
 
La decision respond a la lucha de Salo Muller, un fisioterapèuta retirat d’82 ans que sos parents foguèron menats en tren d’Amsterdam fins al camp de Westerbork, e d’aquí a Auschwitz ont moriguèron assassinats dins la cambra de gas. Lo camp de Westerbork foguèt creat pel govèrn olandés de 1939 per aculhir de migrants jusieus que fugissián l’Euròpa ocupada pels nazis, mas après l’invasion del país, las SS prenguèron lo contraròtle del sit.
 
La societat a creat un comitat per estudiar cas per cas la soma d’indemnizar que cal pagar.
 
Muller a soslinhat que la decision de la societat ferroviària es “istorica”. Per el, la procedura es pas estada aisida mas ara se’n sent fièr. Segon el, sa cambada es estada complicada, e mai lo mond li disián qu’èra una “causa perduda”, mas a tanben recebut lo sosten de “qualques braves personas”. L’an passat, publiquèt un libre entitolat See You Tonight and Promise to Be a Good Boy (A aqueste ser, e promet d’èsser un bon gojat). Lo títol son los darrièrs mots que li diguèt sa maire quand lo daissèt a l’escòla mairala abans d’èsser detenguda per las SS.
 
 
L’SNCF o faguèt jos la pression d’elegits estatsunidencs
 
Aquela decision seguís la que la prenguèt la francesa SNCF en 2014, qu’après la pression de qualques politics estatsunidencs, acceptèt de pagar 44 900 000 èuros per aver menat aperaquí 76 000 personas fins als camps de concentracion pendent lo nazisme. Solament 3000 d’elas subrevisquèron.

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article