Bandièra01 1180x150: Comuna de Tolosa

Actualitats

crotz-tolosaCreated with Sketch.LengadòcLengadòc NautTolosan

Tolosa apròva la revendicacion de l'occitan dins los mèdias publics malgrat una division sus la lista de Moudenc

Segon los opausants, de revendicar l'occitan a las ràdio e television publicas poiriá portar d'autras revendicacions coma “de corses universitaris en occitan” e “l’usatge de l’occitan dins d’actes oficials”

| Lo Collectiu Occitan
Division al sen de la majoritat municipala de Tolosa a respècte de la defensa de l’occitan. Lo grop municipal del cònsol màger, Jean-Luc Moudenc (UMP), se mostrèt devesit lo 7 de decembre passat a l’ora de sosténer l’occitan a las ràdio e television publicas, çò rapòrta La Dépêche.
 
En fin de sesilha, Jean-Michel Lattes, adjonch al cònsol delegat a la cultura occitana, presentèt la demanda del Collectiu Occitan que revendica la preséncia regulara de la lenga nòstra sus France 3 e France Bleu. Lattes presentèt son vòt per mostrar lo sosten dels elegits a las emissions en occitan del servici public de ràdio e television que son temps d’antena seriá menaçat. Lo sosten es arribat, mas suls 52 elegits de la lista de Moudenc, 43 se mostrèron favorables, cinc s’opausèron, tres s’abstenguèron e dos participèron pas al vòte.
 
 
Contra l'occitan per “l’unitat e la concòrdia nacionala” francesa
 
De soslinhar l’argumentacion d’Olivier Arsac, èx-elegit dels Republicans après sa demission del partit ultradrechista de Dupont-Aignan après l’aliança d’aqueste amb Le Pen al segond torn de la presidenciala. Arsac diguèt de non a l’occitan dins los mèdias publics car la revendicacion “concernís pas l’accion municipala” e sustot car contraven a “l’unitat e a la concòrdia nacionala” [vòl dire estatala]. “M’interrògui sus l’oportunitat de prene lo risc de nos fòraviar dins de revendicacions lingüisticas e culturalas que devesisson mai que recampan, e que noirisson benlèu d’autras revendicacions” coma “de corses universitaris en occitan” e “l’usatge de l’occitan dins d’actes oficials”. A mai, Arsac afirmèt que “la Republica es l’unitat dels franceses al delà de lors diferéncias e doncas una lenga comuna e que “l’estacament al patrimòni lingüistic deu èsser vist coma un afar privat, a l’imatge de las religions”.
 
La contrargumentacion venguèt de l’ecologista Régis Godec. “Coneissi pas de comunautarisme occitan”, çò assegurèt en apondent que “parlar occitan es en cap de cas un atac en direccion de la Republica”.
 
 
La revendicacion del Collectiu Occitan
 
Lo Collectiu Occitan amassa un desenat de movements occitanistas, dont Convergéncia Occitana, lo CRÈO, la Confederacion Calandreta, lo Partit Occitan, EELV Occitània, País Nòstre, lo Partit de la Nacion Occitana, Esquèrra Revolucionària Occitana, Bastir, Macarèl e l’Associacion Zo. Revendica la preséncia de l’occitan cada jorn a la television publica, e se mobiliza en vista de la reforma de l’audiovisual public que se debanarà lèu dins l’estat francés.
 
 
Sosten de las comunas
 
Lo Collectiu Occitan a demandat lo sosten de las comunas, mai que mai dels departaments d’Erau e Avairon, e a recebut de responsas positivas d’Agde, de l’aglomeracion de Seta, de Montpelhièr e de las comunautats de comunas de Clarmontés d’Erau e del país de Leveson.
 
Tanben an manifestat lor sosten las comunas de Pòrt la Novèla (Narbonés) e de Virsec, del causse de Larzac que fa partida del departament d’Erau. D’autres sostens son a arribar, çò que mòstra la volontat d’una preséncia pus digna de la lenga occitana a la television publica del país.
 
 
Sosten de Montpelhièr
 
En octòbre passat, la comuna de Montpelhièr aprovèt una mocion en sosten a “una preséncia regulara e crescuda de la lenga occitanas sus la cadena de television publica regionala France 3 e dins los rets locals de la ràdio France Bleu”.
 
 
Una ora e quart per mes
 
A l’ora d’ara, la television publica francesa non prepausa d’emissions en occitan que 17 oras per an, çò que fa una mejana d’una hora e quart per mes. Aquela preséncia es infima se la comparam amb la preséncia de las lengas autoctònas a las televisions dels estats vesins coma Espanha, Soïssa o Belgica.

 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Falipon
12.

Perqué escrivètz, dins aquel article, qu'Olivièr Arsac quand parla de la concòrdia nacionala, vòl dire la concòrdia estatala ? Es pas pus pèc qu'un autre, s'aviá volgut dire "concòrdia estatala" o auriá fach, mas evòca la nacion francesa, es a dire la populacion que viu en França, remosada darrièr un projècte de vida en comun amb de valors partejadas que fondan nòstra solidaritat ; un pauc coma se parlàvem de nacion occitana se n'i aviá una.

  • 4
  • 4
Danièl
11.

Mai d'occitan a França 3, òc-ben ! Mas perqué pas dins las ràdios França Blau? Perqué lo Collectiu Occitan fa pas de manifestacions davant aquelas estacions, que siá a Niça, Ais, Montpelhièr, Tolosa, Pau, Peirigüers, Bordèu, Lemòtges,...? Quand vesèm l'ofèrta en lenga bretona a França Blau Breizh Isel, l'ofèrta en lenga alsaciana a França Blau Elsass, l'ofèrta en lenga basca a França Blau Euskadi, l'ofèrta en lenga còrsa a França Blau Frequenza Mora,... e quand vesèm l'ofèrta en lenga nòstra per las 10 o 12 estacions França Blau que deurián far mai d'occitan: es una vergonha !!! Es una vergonha tanben que l'occitanisme faga o demande pas res !

  • 16
  • 0
Jean-Charles Valadier Tolosa
10.

Coma predecessor de Jean Michel Lattes, en carga de la lenga occitana a Tolosa, e mai como opausant politic, o vòli saludar per son accion per l'occitan a Tolosa.
Foguèt per ieu fòrça dificil de faire votar de délibérations en favor de l'occitan que l'oposicion es sempre contra çò que propausa la majoritat e la mitat dels eligits d'esquèrra son opausat a l'occitan o n'an vergonha. Vòli saludar los elegits ecologistas que son los sols elegits d'oposicion de Tolosa que demorèron per sostenir l'occitan a la television. Per avançar per l'occitan, cal una Union nacionala occitana dels elegits favorables a l'occitan, de la dreita à l'esquèrra.
Volèm d'occitan a la television

  • 14
  • 0
francesc palma
9.

Visca Tolosa, ciutat gloriosa e poderosa. Montpeller, Agde,Seta,departament d'Erau e Avairon,... Molt ben en defensa de la lenga nostra. FR3 ha de far mai programas en Oc, hi ha molt de trabalh a far per cobrir tota o bona part del territori occitan, e una programacion diaria informativa e variada que se convertesca amb la tv de referencia per la region.

  • 2
  • 0
Felip Martèl Montpelhièr
8.

Arsac, Arsac… pas tròp francés, coma nom. (Arcy ? Arcey ? Arcé ?). Quauqu'un li poiria dire que de corses en occitan a l'Universitat, fai de temps que n'i a, e es pas aquò que provòca lo rechaufament climatic. Un poiria tanben, vist que ven de Debout (sic) la France, li dire, dins sa lenga, coucouche panier.

  • 14
  • 1

Escriu un comentari sus aqueste article