Se publicarà en genièr lo libre escrich per l’elegit catalan encarcerat, Raül Romeva. Entitolat Esperança i Llibertat (Esperança e Libertat), lo libre foguèt escrich en novembre passat e conta d’experiéncias en preson, fa de reflexions politicas sus l’actualitat e expausa son viscut personal de la darrièra annada. En mai d’aquò, conten de convèrsas amb qualques escrivans e de mond de la cultura, e tanben detalha e precisa sa posicion davant lo jutjament de la Cort suprèma espanhòla.
 
De la preson estant, Romeva a dich a l’agéncia catalana d’informacions ACN que lo libre cèrca d’èsser “una pausa qu’ajude a prene consciéncia del moment”. En mai d’aquò, l’autor conta que i son rebatudas “fòrça pensadas que flotavan” abans d’èsser encarcerat.
 
L’autor resumís atal son obratge:
 
“Es un libre de pensada politica, de reflexions, de proposicions, tanben de fòrça dobtes, mas a l’encòp de qualque certitud. I mediti sus la vida en preson, mas sustot sus las rasons de nòstra situacion. Parli del passat, per mètre en contèxt de sentiments e de reflexions, fòrça del present, per saber ont sèm vertadièrament, e fòrça del futur, per saber ont volèm anar e sustot perqué i volèm anar”.
 
La tòca es de “donar al legeire un pauc d’aquela esperança e enveja de libertat; perque la preson dura un temps, mas la dignitat e la fiertat i son per totjorn”, çò precisa en afirmant qu’eles capitaràn ben.
 
 
 
 

---

ROMEVA, Raül. Esperança i Llibertat. Ara Llibres, 2019. 288 paginas. 18,90 èuros.