Bandièra01 1180x150: Comuna de Tolosa

Actualitats

Itàlia a aprovat in extrèmis lo budget per 2019 pachat amb l’UE

L’oposicion a criticat fòrça la manca de debat parlamentari e l’impacte social e economic que pòt aver la lei budgetària aprovada

| La Repubblica
L’an 2018 s’acabèt en Itàlia amb l’aprobacion in extrèmis del budget per 2019 pachat amb Brussèlas. Dins una votacion finala cargada de tensions, 327 deputats votèron en favor del comptes pachats amb l’Union Europèa, 228 votèron contra e i aguèt una abstencion. L’oposicion a criticat fòrça la manca de debat parlamentari e l’impacte social e economic que pòt aver la lei budgetària aprovada, çò rapòrta La Repubblica.
 
 
Longa istòria, la del budget italian per 2019. En octòbre passat, la Comission Europèa rebutèt lo budget e demandèt al govèrn d’aquel país, compausat de la Liga e del Movement 5 Estelas, que lo tornèsse presentar dins un relambi de tres setmanas. Èra lo primièr còp de l’istòria que l’executiu europèu refusava un budget d’un estat membre. Mas en novembre, lo ministre italian de las finanças, Giovanni Tria, mandèt una letra a la CE ont avertissiá que i auriá pas los cambiaments que demandava Brussèlas.
 
Aquel braç de fèrre finís amb un acòrdi entre l’UE e Itàlia que fixa la chifra d’un 2,04% del PIB coma objectiu de deficit budgetari. Aquò es una baissa del deficit prepausat al començament, que correspondiá a un 2,4% del PIB italian. En mai d’aquò, se rebaissa tanben la prevision de creissença de l’economia italiana a l’1%.
 
Ara, per evitar de sancions de l’UE e lo puniment dels mercats internacionals, Itàlia afronta l’enjòc de conténer un deute public descabestrat, que despassa lo 130% del PIB.
 
 
De protèstas
 
Aquel budget, doncas, comportarà d’ajustaments, de reduccions de despensas publicas, de copaduras.... E atal o an vist los milièrs de personas qu’an tornat manifestar per carrièras en protèsta contra las consequéncias qu’aurà aquel budget.
 
De son caire, lo Partit Democrata a denonciat aquel budget al Conselh Constitucional.



abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Papioli
2.

#1
Bras de fer, bras de fer?

Anirai, bras dejos, bras dessus
coma los gilets jaunes

  • 1
  • 0
Lachaud
1.

Bras de far, es lo mot a retener d'aquel article. Bras de fer, bras de fer, entre l'UE e los etats. Bras de far entre los gilets jaunes e lòr estat que dependents de l'UE. A quand cambariem lo governament de l'UE,

  • 4
  • 0

Escriu un comentari sus aqueste article