Bandièra01 1180x150: País Invisible

Actualitats

Limon: tensions a la gara que daissa unes dos cents viatjaires a pè

Mai de 200 passatgièrs del bilhet compostat an pas pogut accedir al tren qu'èra ja clafit de mond

Indignacion ciutadana a Limon (Val Vermenanha) a causa del marrit servici de la linha ferroviària entre Coni e Niça provesit per Trenitalia.  Dimècres passat, 2 de genièr, lo tren arribèt dins l’estacion clafit de mond, del temps que unas doas cents personas i podián pas accedir e mai aguèsson crompat e compostat lors bilhets. I aguèt de moments de tension entre los passatgièrs que volián intrar dins lo tren, çò rapòrta La Stampa.
 
Los operators de la gara assegurèron l'arribada de cinc autobuses mentre los passatgièrs esperavan dins lo freg sus la plaça. Lo tren partiguèt devèrs la Val de Ròia a 15h17 e los autobuses arribèron devèrs 19h. Mentretant, los passatgièrs trobèron de solucions alternativas, tant i a qu'enfin calguèt un sol autobús per menar en Ligúria lo mond qu’èran demorats sens accès al tren.
 
La causa d'aquel fach es l'enòrma quantitat de toristas qu’an passat lors vacanças de Nadal e cap d'an dins los centres toristics de la Val Vermenhana. Mas cal apondre qu'aquela linha de tren que travèrsa las vals de Ròia, Vermenhana e Pes patís de mai en mai un marrit servici, sustot pels abitants del parçan.
 
Dempuèi la fin de 2012, los trens entre Ventemilha e Coni s’arrèstan pas pus dins las petitas estacions liguras e occitanas, çò qu'a portat una catastròfa al torisme local e als emplecs de Val de Ròia, mai que mai a Tenda e la Briga.
 
Los usatgièrs del país que fasián servir aquela linha joglavan ja abans amb las correspondéncias de las companhiás dels dos estats. Ara, solament los trens de l’SNCF s’arrèstan a Fontan-Saorj, a Sant Darmatz de Tenda, a la Briga e a Vievòla.
 
 
 
 


 




 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

E Passa Que T Ai Vist
3.

Coma que i a pas que la SNCF per abandonar a mieg las linhas dichas d'interès local... Per la pichota istoria lo defuntat cantaire piemontés Gian Maria Testa que comencèt per cantar de tradicionals occitans abans de far de cansons en italian e en piemontés foguèt lo cap de gara (e oc !) de Coni. De l'autre costat de la montanha lo niçard Joan-Luc Sauvaigo cantava lo "tren dei pinhas" que passeja dau pais niçard fins a Dinha. Trens de Provença-Niça-Piemont-Liguria, setz tota un poësia !

  • 2
  • 0
Gerard Joan Barceló Pèiralata
2.

#1 Grandmercé per la lectura! L'error d'inatencion es estada corregida.

  • 2
  • 0
Reinat TOSCANO LO VAU
1.

La segonda linha contèn un error: cau lièger Coni, e non *Cuni.
La forma italiana es Cuneo ['kuneo], la forma piemontesa e occitana es Coni ['kuni], en francés Coni [ko'ni].
(vèrs la fin de l'article, es ben escrich Coni)
Cau anar vèire aquò:https://www.youtube.com/watch?v=zjRBD8rwdsw, dont es explicada la formacion de la vila.

  • 1
  • 0

Escriu un comentari sus aqueste article