Lo candidat de l’Union per la Democracia e lo Progrès Social (UDPS), l’opausant Félix Tshisekedi, s’es impausat a las eleccions presidencialas que se tenguèron lo 30 de decembre passat en Republica Democratica de Còngo (RDC), segon las donadas provisòrias publicadas per la Comission Electorala Nacionala Independenta (CENI).
 
Lo president de l’organisme, Corneille Nangaa, a detalhat que Tshisekedi a obtengut aperaquí lo 38,6% dels vòts, davant Martin Fayulu, qu’a atench lo 34,8%.
 
Lo candidat del partit del govèrn, Emmanuel Ramazani Shadary, es demorat en tresena posicion amb lo 23,8% del vòtes.
 
Après la publicacion de las donadas, Nangaa a mercejat lo pòble e la premsa, e a indicat que lo vòte obtengut una participacion d’un 47,56%.
 
 
Violéncia politica
 
Las eleccions se deurián èsser tengudas en 2016, mas fin finala aguèron luòc lo 30 de decembre passat. Totun, dins las vilas de Beni e de Butembo son retardadas fins al mes de març. Aquelas vilas son dins la província de Kivu Nòrd, qu’es la region afectada per una flambada d’Ebòla. Per tant, se votarà aquí qualques meses après la presa de possession del nòu president, qu’es prevista pel 18 de genier que ven, tres jorns après la proclamacion dels resultats provisòris. Aqueste fach a descadenat de grandas protèstas dels ciutadans que considèran que lor volontat es pas presa en compte.
 
Aquela violéncia a causat una grèva estenduda de l’epidemia d’Ebòla, çò raportàvem l’8 de genièr passat.