Per la 17a jornada dau championat de basquet de Jeep Elite (èx-Pro A), lo Limòtges CSP recebiá diumenc passat, dins sa sala dau palai daus espòrts de Bòsc Blanc, l’esquipa de Pau-Lac-Ortés, l’Eslanç Bearnés. La rivalitat, totjorn fòrta, entre Limòtges e Pau, data daus ans 1980 dau temps que las doas esquipas se brejavan en fasa finala (playoffs) per lo sacre e se partejavan pauc que pro tots los títols de champion de França. Dempuei, las partidas entre Limòtges e Pau son totjorn un temps fòrt dau championat. Los suportaires dau CSP a Bòsc Blanc – mas los de Pau tanben –, sostenen lor equipa coma en degun luec mai dins un ambient de fuòc.
 
Queste diumenc, Limòtges (9n dau championat) aculhiá donc Pau (2d dau championat) per lo 104n còp (52 victòrias per Limòtges aura contra 51 per Pau e un nul). La partida comencet d’un biais equilibrat, las doas esquipas se seguent a la marca, mas lo CSP comencet de menar bravament en profechar que los palés faguessan mòstra de pauc de rëussida aus tirs. Au mieg temps, lo CSP menava de 10 punts. A la represa, Jerry Boutsiele, lo pivòt de Limòtges, se faguet particularament remarcar per sa granda forma, subretot au 3n quart temps, l’avança de Limòtges monta a 20 punts. Lo quatren quart temps fuguet pas tant intense mas lo CSP, qu’aviá pres tròp d’avança, chaminet docetament vers sa 52a victòria contra Pau sus una marca de 81 a 68. Las doas esquipas se tornaràn rescontrar per lo match retorn a Pau puei, probable, per los playoffs a la fin de la sason regulara.
 
La setmana passada, Limòtges aviá perdut la partida contra Valéncia dins lo top 16 (segonda fasa de l’Eurocup) sus una marca de 79 a 74.
 
 
 
 
Joan-Cristòu Dourdet
 
 
 

52-51

Un Beaublanc indescriptible pour cette affiche ancrée dans le cœur de tous les amoureux du @limogescsp#CSPnationpic.twitter.com/qHmXXUZ49I

— Limoges CSP (@limogescsp) 20 de gener de 2019

 

L'Elan s'incline à Beaublanc
Réaction attendue au Palais dès la semaine prochaine face à @ELANCHALON en #CDFBasket puis face à la @sigstrasbourg@cjharris11 16 pts, @DigueDiawara 13, @Leo4valiere 10 (10 rbds)
©Sylvain Vergne#CSPEBPLO#SpecialGame#ELANation#JeepELITEpic.twitter.com/oapW7ytX2J

— Elan Béarnais (@EBPLO) 20 de gener de 2019