Bandièra01 1180x150: Comuna de Tolosa

Actualitats

Politica

Las enganas de Le Pen e Dupont Aignan sul Tractat d'Aquisgran

Una tièra de messatges de desinformacion e de propaganda an precedit l’acòrdi de cooperacion que signèron Emmanuel Macron e Angela Merkel dimars passat

| @JY_LeDrian
Una tièra de messatges d’engana, de desinformacion e de propaganda an precedit l’acòrdi de cooperacion que signèron Emmanuel Macron e Angela Merkel dimars passat a Aquisgran. L’acòrdi cèrca de donar de vam a l’unitat europèa e es acompanhat d’una seguida de projèctes comuns que lor tòca es de mostrar que tant Alemanha coma França bailejan ensems l’Union Europèa.
 
Un dels ponches qu’an espaventat e indignat los sectors ultrafrancistas es lo fach que l’acòrdi d’Aquisgran s’engatje a promòure lo bilingüisme dins las regions transfrontalièras. A partir d’aquí an començat de virar de messatges messorguièrs qu’asseguran que los alsacians seràn obligats d’aprene l’alemand, que França va liurar Alsàcia e Lorena a Alemanha, que França partejarà amb Alemanha sa plaça al Conselh de Seguretat de l’ÒNU e qu’aqueste acòrdi anulla lo dich Tractat de l’Elisi que signèron Adenauer e de Gaulle en 1963 e que, curiosament, tanben s’engatjava a promòure lo bilingüisme dins las regions transfrontalièras.
 
La cap del Recampament Nacional, Marine Le Pen, a anonciat que presentarà un recors contra l’acòrdi davant lo Conselh Constitucional. Le Pen denoncièt que França partejariá sa plaça del Conselh de Seguretat de l’ÒNU amb Alemanha. Mas l’Elisi assegura qu’aquela plaça se pòt pas partejar e que l’acòrdi simplament refortís la cooperacion dels dos païses; dins aquel sens, per la presidéncia francesa, se remembra que per França es una “prioritat” qu’Alemanha pòsca intrar al Conselh coma membre permanent.
 
De mèdias ultradrechistas an assolidat qu’Alsàcia e Lorena seràn tornats a Alemanha. L’Elisi a rebutat aquelas falsas informacions, en precisant sonque que l’acòrdi d’Aquisgran prevei una adaptacion de las leis francesas e alemandas per facilitar lo desplaçament dels trabalhadors transfrontalièrs e dinamizar los projèctes economics.
 
Enfin, l’extrèma drecha francista s’esglàsia en cresent que los alsacians serián forçats d’aprene l’alemand. Ara per ara, los alsacians demòran obligats d’aprene lo francés e d’oblidar lor lenga.

 

 

 

 
 

 
 
 


abonar los amics de Jornalet
 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ròdrigo Bigòrra
3.

en çò qu'a dit M Lepen sus eth sieti der'ONU que i a totun un drin de vertat , que m'etspliqui en aqueth tractat que i a eth conselh de defenssa e de seguretat Francò Aleman on ei estipulat que en eth conselh de seguretat der'ONU França qu'a consultar eths Alemans avant de prener ua decision donc en arrelitat eth sieti de França qu'ei partatjat !

  • 3
  • 12
Oksıtanlaştıramadıklaramızdanmısınz
2.

#1 Segur que jornalet plan carat dins sa fobía, nos parla de l'ultra drecha amb'un discors d'ultra esquèrra! Mas nos parla brica d'aquel tractat, nimai que nos parlèc brica del pache de marrakech.

Lo contengut d'aqueles dos tractas auràn consequencias de segur, mas qu'unas son las amiras de tot aquò ? O sabem brica !*De qu'un es lo punt de vista occitan ? (e occitan vòl pas diser sonque jornalet) E ben n'en sabem ren de ren l'ermàs de la pensada occitana ! e las ucadas dels balucs d'ultra esquèrra ... vai t'en far quicòm amb'aquò tè !

Vertat qu'es un desaise grand e que contrista tot aquò !

  • 3
  • 14
Lachaud
1.

Perque s'occupa de las jacassarias daus uns e daus autres?
Sem occitans e en tant qu'occitans volam defendre e reviscolar la lenga de nos pairs e mairs mas tanben lo territori ente se parlava.
Qu'avem besonh de nos ocupar de le Pen e Dupont Aignan. Fasem mai de propagande per aqueus dos partits que lor discors.
D'un autre biais, i a de las fòrças (au servici de qui?) que son prestes a far de las desinformacions per empeschar tot desbat serios. Quò vòla au ras de las paqueretas e avem benleu besonh de pas tombar dins aquel traquenard.
Qual son los accòrds passats entre Alemanha e França? Coma de costume sem mas informats de 10 dau cent de la vertat.
Si Lo Pen es lo sol a denonçar aquel accòrd, votarem per ilh o ela. Que pensa l'esquera que sembla majoritaria dins jornalet?
Coma lo disia la fada de Montpelièr, retene pas tot çò que legisse o auve dins los medias mas sei pron inteligenta per pensar per me-mesme.

  • 3
  • 6

Escriu un comentari sus aqueste article