Bandièra01 1180x150: País Invisible

Actualitats

Un assag d’assaut contra una basa turca dins la region del Curdistan d’Iraq s’acaba amb la mòrt de dos manifestants

La protèsta, la primièra d’aquela amplor, denonciava los bombardaments repetits de l’aviacion e l’artilhariá turcas contra lo territòri

Qualques centenats de manifestants an ensajat d’assautar una basa turca en territòri curdoiraquian per protestar contra la mòrt de sièis personas long de la setmana a causa dels bombardaments de l’aviacion turca
Qualques centenats de manifestants an ensajat d’assautar una basa turca en territòri curdoiraquian per protestar contra la mòrt de sièis personas long de la setmana a causa dels bombardaments de l’aviacion turca | Kurdistan24
Una protèsta populara a Sheladize, al nòrd de la Region del Curdistan d’Iraq, contra las operacions de bombardament de l’armada turca a acabat aquesta dimenjada amb dos manifestants mòrts a las mans de soldats turcs, çò rapòrtan de mèdias locals. Qualques centenats de manifestants ensagèron d’assautar una basa turca en territòri curdoiraquian per protestar contra la mòrt de sièis personas long de la setmana a causa dels bombardaments de l’aviacion turca.
 
Turquia bombarda repetidament la franja nòrd del territòri curd iraquian dins l’encastre de las operacions contra la preséncia e contraròtle parcial que lo Partit dels Trabalhadors de Curdistan (PKK) ten dins la zòna. E mai Turquia i ten una vintena de basas militaras. Ara es estat lo primièr còp que la populacion locala a menat a tèrme una accion d’aquela magnitud contra una basa turca.
 
Segon lo ministèri dels Peshmèrguas, del govèrn regional curdoiraquian, tre lo començament de 2015 fins a fin de 2018 l’armada turca menat a tèrme almens 800 atacas armadas sus la zòna.
 
Lo ministèri dels Afars estrangièrs iraquian a publicat una nòta qu’afirma que presentarà una protèsta a l’ambaissador turc a Bagdad. Lo ministre de la Defensa turc, Hulusi Akar, a anonciat que los bombardaments contunharàn e a acusat lo PKK d’èsser “infiltrat” entre los manifestants.
 
 
 
Aquesta nòva es adaptada de Nationalia, amb qui Jornalet ten un acòrdi de cooperacion.
 
 
 


abonar los amics de Jornalet

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article