Bandièra01 1180x150: Comuna de Tolosa

Actualitats

Tolosa: reüssida de la manifestacion per l’occitan dins l’educacion. La mobilizacion contunha

La secretària de la rectritz considèra “inadmissible” que de caps d’establiments ajan fach de causidas contra l’occitan en reaccion a la reforma del licèu. Se manten la pression e s’anóncia una manifestacion unitària

Mai d’una centena de personas manifestèron ièr a Tolosa jos la pluèja contra la liquidacion de l’occitan dins l’ensenhament public. Indignats, los manifestants s’acampavan davant lo rectorat en planhent aquesta situacion talament grèva que daissa sens occitan gaireben 15 000 escolans que fins ara an beneficiat d’entre 1 e 3 oras d’occitan per setmana.
 
Lo president del Centre Regional dels Ensenhaires d’Occitan de Tolosa (CRÈO Tolosa), Nicolau Rei-Bèthvéder arribèt d’èsser recebut per la secretària de la rectritz. Segon ela, los caps d’establiments aurián fachas de causidas contra l’occitan en reaccion a la reforma del licèu, e per tant convidèt los ensenhaires a adreiçar lors planhs pels cases ont los caps d’establiments aurián pas respectat la convencion per l’occitan. Rei-Bèthvéder n’es pas gaire convencut e, compte tengut que l’acadèmia de Tolosa a mes fin a la dotacion especifica que finança l’occitan dins los collègis e licèus, assolida lo mantenement de la mobilizacion.
 
Segon la rectritz, “i a de caps d’establiment que se son permetuts de recuperar de mejans per suprimir l’occitan de lor pròpria iniciativa”, çò diguèt Rei-Bèthvéder a l’antena de Ràdio País just après la reünion. “La rectritz a dit qu’aquò es pas possible e que nosautres, lo CRÈO, avèm de remontar los problèmas”, çò precisèt. Totun, el li respondèt “qu’aquò es plan, encara de paraulas, mas que [lor] cau un escrit pr’amor los caps d’establiment pòdon totjorn díser qu’aquò es faus”.
 
En mai d’aquò, la rectritz auriá recebut de telefonadas de plusors elegits que protestavan contra aquesta situacion.
 
“Aquò a servit e que cau contunhar a manténguer la pression”, çò manifestèt Rei-Bèthvéder.
 
Ara, lo CRÈO prepara una manifestacion unitària a l’escala d’Occitània tota. Lèu se n’anonciarà lo luòc e la data.
 
 
Una situacion fòrça grèva per l’ensenhament de l’occitan
 
De fach, se tracta d’una situacion fòrça grèva per l’occitan. L’acadèmia de Tolosa es una de las onze subdivisions escolaras que tòcan Occitània dins l’estat francés. Aquesta administracion a mes fin a la dotacion especifica que finança l’occitan dins los collègis e licèus e daissa sens occitan gaireben 15 000 escolans. Tanben son pertocats una cinquantena d’ensenhaires d’occitan dins l’acadèmia mondina.
 
Dins la rèsta d’Occitània administrada per França, la situacion es pas melhora. Dins las acadèmias de Lemòtges, Clarmont e Grenòble, l’occitan dins los licèus e collègis es anecdotic. A Montpelhièr e Ais, l’occitan a fòrça reculat davant las atacas dels diferents rectors. D’anóncias de barraduras son estadas fachas en Provença ont lo rector se trufa “d’una lenga que se parla pas”. L’explicacion de la fin de l’occitan es lo pretèxt de la reforma Blanquer dels licèus. Lo 60% dels escolans del segondari es dins l’acadèmia de Tolosa. L’occitan es tanben fòrt a Niça, mas patís fòrça la reforma mortifèra dels licèus. La vertat es que i a una volontat evidenta de metre fin a l’occitan al Ministèri de l’Educacion de París.

 
 
 
 

 

 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Guilhèm Thomas Tolosa
4.

La supression de l'occitan dins l'ensenhament publica

es politica,

e non pas economica. Es estat clar !

  • 10
  • 0
Bhl
3.

Aurén polgut aprofiechar de l'escazença per damandar l'occitan a la tv cada jorn!

  • 5
  • 3
Papioli
2.

Si avia tot l'òr dau monde, mon pais s'apelaria Occitania.
Seria pas obligeat de quemandar quauquas mietas per ensenhar sa lenga, son istoria, sa cultura.
Seria pas obligeat de paiar de las taxas a un estat estrangier que li vòle son identitat, son economia, son autonomia...
Si avia tot lòr dau monde...

  • 11
  • 4
Trencavèl Tolosa
1.

Òsca al president del CREO ! mercé Nicolau de ton militantisme.

  • 31
  • 2

Escriu un comentari sus aqueste article