Bandièra01 1180x150: Comuna de Tolosa

Actualitats

Madrid: comença lo jutjament contra los nòu presonièrs politics catalans

Lo procès, seguit per de jornalistas del Mond entièr, es fòrça politizat e a per orizont la Cort Europèa dels Dreches Umans d’Estrasborg. Lo tribunal a rebutat los observaires internacionals

Comença uèi a Madrid lo jutjament contra los nòu presonièrs politics catalans. Totes los acusats son enseguits per aver organizat o permés lo referendum d’independéncia de Catalonha e Aran lo 1r d’octòbre de 2017, e son acusats de rebellion, violéncia e sedicion; riscan de penas de fins a 25 ans de preson.
 
Lo procès, seguit per de jornalistas del Mond entièr, es fòrça politizat e a per orizont la Cort Europèa dels Dreches Umans d’Estrasborg. Lo tribunal a rebutat los observaires internacionals qu’avián demandat d’èsser presents dins la sala, coma Amnestia Internacionala e Trial Watch. La cort afirma que lo jutjament serà retransmés per la television e que, per tant, los observaires internacionals an pas besonh d’èsser presents. Mas l’emission de television serà realizada dins lo tribunal e dos jutges seràn los que provesiràn los jornalistas de las explicacions necessràrias. La tòca es d’ensajar d’influir sul Mond lo biais d’explicar lo jutjament.
 
Los avocats defensors son estats acusats pels jutges de voler alongar innecessàriament la procedura, del temps que los avocats planhon de se poder pas preparar, mai que mai amb l’encarceracion de lors clients.
 
Lo jutjament lo vòlon far rapid per qu’interferisca pas dins las eleccions municipalas e europèas del 26 de mai. Aquel jorn se tendràn tanben las eleccions al Conselh General d’Aran e dins mai d’una comunautat autonòma espanhòla. Amb aquel calendièr es previst que las senténcias sián publicadas en junh o julhet.
 
Las sesilhas se tendràn los dimars, dimècres e dijòus, de 10h a 18h, amb una pausa de 1h30 per dinnar. Mas se pòdon esperlongar als diluns e dissabte. Los presonièrs seràn menats cada jorn de la preson al tribunal e del tribunal a la preson. Poiràn declarar sens las manetas durant lors sesilhas.
 
Lo tribunal que los jutja es compausat de sèt jutges. Cinc d’eles foguèron recusats per los avocats per manca d’imparcialitat, mas aquelas recusacions son estadas refusadas.
 
 
Las penas encorregudas
 
Lo ministèri public demanda que sián acusats de rebellion, malversacion de fonzes e sedicion. Per Oriol Junqueras, desira 25 ans de preson e d’inelegibilitat; per Carme Forcadell, Jordi Cuixart e Jordi Sànchez, 17 ans de preson e d’inelegibilitat, e per Rull, Turull, Romeva, Forn e Bassa, 16 ans de preson e d’inelegibilitat. Al costat del ministèri public, lo partit ultradrechista Vox es partida civila.
 
Los testimoniatges
 
La Cort Suprèma espanhòla citarà a declarar l’èx-president del govèrn espanhòl Mariano Rajoy, sa vicepresidenta Soraya Sáez de Santamaría e l’èx-ministre de las finanças Cristóbal Montoro. Tanben seràn cridats a testimoniar un fum de politicians espanhòls, bascos e catalans e l’occitana Mireia Boya. Tanben cridaràn qualques ciutadans e d’agents de la polícia espanhòla. Pasmens, lo tribunal a refusat que la defensa cride a declarar lo president de la Generalitat en exili, Carles Puigdemont, e lo rei d’Espanha, Felip VI, entre d’autres. De soslinhar lo refús de las compareissenças dels especialistas en dreches umans Noam Chomsky e Paul Preston, e mai dels raportaires de l’ÒNU David Kaye e Alfred Maurice de Zayas.
 
 
Mobilizacions
 
Durant tota la jornada i a agut de mobilizacions pertot en Catalonha e tanben en Aran. En mai d’aquò, una manifestacion unitària es anonciada dissabte venent, 16 de febrièr, a Barcelona, mentre que se’n farà una autra a Madrid lo 16 de març. Tanben an cridat a una cauma generala lo 21 de febrièr.
 
 
Los autres enseguits
 
Mentretant, s’alestís a Barcelona lo procès contra los autres membres del govèrn de Puigdemont, contra lo burèu del Parlament de Catalonha e contra la deputada occitana Mireia Boya. Pels èx-ministres de la Generalitat Carles Mundó, Santi Vila e Meritxell Borràs, que son en libertat condicionala, se sollicita 7 ans de preson per malversacion e desobesissença. Dins lo cas dels membres del burèu del parlament e de l’èx-deputada occitana de la CUP, Mireia Boya, lo ministèri public sollicita una multa de 30 000 èuros per desobesissença.
 
 
Podètz seguir lo jutjament en dirècte sul sit de la Television de Catalonha.
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
4.

Los fanatics religiosos de l'Opus Dei havien lo sieu libret "Camino". Los pichons capets defensors de la Constitucion espanyola reconeissen pas los Drets Humans de l'ONU que lo govern espanyol "democratic"signet. Los Drets Humans son de rang superiora a la constitucion del estat, mas la constitucioneta aprrovada per sortir del franquisme, los exfranquistes ara la fan dogma de fé intocable, sa biblia paraula de Diéu, e lo que s'atrevesca a far-li la contrària ha de ser cremat. L' Inquisicion, la gran mentida al servei de l'estat que non vol recoéisser los Drets Fonamentals. E lo PSOE es tan fluis que non es capaç de defensar mai qu' a l'extrema dreta del tripartit, e non gosa dialogar e far las reformas per ser un estat plurinacional. Ara es Pedrito Sanches que no vol pas ni dialogar. Coma pot anar a l'estranger a donar liçons ?

  • 1
  • 0
Franc Bardòu
3.

Un procès per delicte d'opinion ! Una farça impensabla per un jutjament de carnaval !!! Los acusators de uèi seràn los condamnats de l'Istòria dels pòbles liures…

  • 19
  • 0
Pitaluga
2.

Aquel procés es una capbordisa coma la muralha de China: son a jutjar los milions de personas que votèron al referendum del 1O. Ont traparàn las presons per i metre tot aquel mond?
Los qu’an montat aquel procés son de faissistas perque,
1)coma se vei plan es una foliá ;
2) es lo procés contra la democràcia;
3) es bailejat pels descendents del franquisme, per d'eiretièrs assumits de la "España Imperia"l, aquela del corbàs sul drapèu.

  • 15
  • 1
Patrici Pojada
1.

Una vergonha, a las nòstras pòrtas, que desbrembam pas.

  • 25
  • 1

Escriu un comentari sus aqueste article