Bandièra01 1180x150: País Invisible

Actualitats

Argeria: Butafliqa se presentarà pas a la reeleccion

A remés las eleccions presidencialas per convocar, abans, una conferéncia qu’establisca las basas d’una “nòva Argeria”

Lo president d’Argeria, Abd Al Aziz Butafliqa (sovent transcrich AbdelazizBouteflika), anoncièt diluns passat que fin finala se presentariá pas a las eleccions per un cinquen mandat, e diferiguèt lo moment de las presidencialas. E mai convoquèt una conferéncia estalala (ditz nacionala) per establir las basas d’una “nòva Argeria”.
 
Las protèstas multitudinàrias an reüssit. E lo president reconeguèt dins son discors “d’importantas marchas popularas” e diguèt que ne “compreniá las rasons”. De mençonar que dempuèi doas setmanas, de milièrs de personas an manifestat per las carrièras de divèrsas vilas d’Argeria, contra la decision de Butafliqa de se presentar a las eleccions. Los manifestants remeton en causa sa capacitat de demorar al poder a 82 ans.
 
“I aurà pas u cinquen mandat e es jamai estat una question per ieu”, çò anoncièt Butafliqa, en assegurant que sa santat e son edat li “assignavan coma darrièr dever envèrs lo pòble argerian d’establir las basas d’una nòva republica”. “Aquesta nòva republica e aqueste nòu sistèma seràn entre las mans de las nòvas generacions d’argerians”, çò apondèt.
 
Butafliqa es al poder dempuèi 1999. Dempuèi 2013 es a pena paregut dins los mèdias dempuèi que patiguèt una crisi cardiaca. D’efièch, tornèt dimenge d’un sojorn espitalièr d’una setmana en Soïssa”.
 
 
Conferéncia estatala per transformar lo país
 
D’autre caire, Butafliqa anoncièt la tenguda d’una “conferéncia nacionala inclusiva e independenta” amb la tòca de “discutir, elaborar e adoptar totas las sòrtas de reformas de besonh per bastir la basa del nòu sistèma”.
 
Segon lo president, la conferéncia implicarà la participacion de la societat civila de biais “equitable” e serà dirigida per una “instància presidenciala plurala”, pachada consensualament”.
 
Puèi se faràn las eleccions.

 
 


abonar los amics de Jornalet
 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
4.

E lo Botafliqa, l'Elisèu l'interèssa pas? Farà pas pièger que l'arlèri que se'n ocupa... vòli dire: qu'o ocupa!

  • 5
  • 0
fancesc palma
3.

Lo FLN ha altres candidats joves e madurs que poden sustituir perfectament e continuar la tasca de govern que han menat fins ara. Visca Algeria !

  • 2
  • 2
Jiròni B. Sent Liunard (87)
2.

Mercés per queu brave trabalh de respect de l'arabi dins sa transcripcion en occitan.
Abd Al Aziz Butafliqa : en arabi : عبد العزيز بوتفليقة (ʿAbd al-ʿAzīz Būtaflīqa) : [ʕabd lʕziːz buːtfliːqa]

Los francés colonialistas an desformat los noms en arabi dialectau, coma sur tot lu territòri francés.

  • 3
  • 0
Oksitanlaştıramadıklarımızdanmısınız
1.

E lo vièlh guèine ensatja de colhonar son mond...!
Me pòdi pas presentar e ben I aurà pas cap d'eleccions per ara !

  • 3
  • 1

Escriu un comentari sus aqueste article