Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Eth Sindic d’Aran s’a amassat damb eth baile de Luishon entà presentar-li eth futur Aran Park

Dimarts passat, 27 de noveme, eth baile de Luishon, Louis Ferré, que s’amassèc en Conselh Generau d’Aran damb eth Sindic d’Aran, Carlos Barrera; eth conselhèr d’Entrepresa e Trabalh, Eduardo Valdecantos; e era conselhèra de Torisme, Comèrç e Consum, Anna Díaz. Era tòca dera amassada que siguèc presentar-li eth futur Aran Park, qu’eth pròplèu mes de març e daurirà es sues pòrtes en Bossòst (Val d’Aran).


“Eth motiu dera reünion a estat poder compdar damb eth supòrt deth baile de Luchon entà atrèir toristes francesi, grops escolars e torisme familhar qu’ajuden, ath delà deth torisme deth país, a dinamizar era economia dera Val d’Aran e en concrèt era deth terçon de Quate Lòcs” ce manifestèc Valdecantos.
 
Aran Park s’agís d’un parc naturau de 16 ectars que compdarà damb un centre d’interpretacion, ua botiga, ua auta d’aprendissatge, un restaurant e ua zòna de picnic, tot plan abilitat damb eth minim impacte ambientau. “Se demore qu’eth parc acuelhe eth prumèr an ues 20_000 persones, e 50_000 es dus ans següents” ce soslinhèc eth Sindic d’Aran.
 
Eth parc ja compde damb cinc cèrvis e tres cabiròus e quan finalizen es òbres d’electrificacion deth recinte que s’i incorporaràn es ossi e es lops, ath delà de gatilops e isards, entre d’auti, enquia arribar a miei centenat d’espècies que seràn en semilibertat.
 
Eth director deth parc que serà Sèrge Mounard, que dempús 1993 e dirigís ua installacion similara ara aranesa en Argelèrs de Gasòst (Lavedan) qu’acuelh annauments ua mejana de 150_000 visitants.
 
 
 
 
FM/CGA

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Arnaud Lo Chastelard Melan
1.

Chal esperar que costat luishonés seran inspirats egalament per ce que se fai costat aranés al nivèl de la lenga occitana. Espero que la disparitat de projeits entre les dos costats exista pas e se n'i a que fan avant ensèm per la lenga.

  • 1
  • 0

Escriu un comentari sus aqueste article