Bandièra01 1180x150: Comuna de Tolosa

Actualitats

Lo CRÈO Tolosa contunha de mobilizar

Après la granda manifestacion del 17 de febrièr, lo Centre Regional dels Ensenhaires d’Occitan de Tolosa s’acampèt en una Assemblada Generala extraordinària

Après la granda manifestacion del 17 de febrièr, lo CRÈO Tolosa s’acampèt en una AG extraordinària . Se debanèt a l’Ostal d’Occitània lo 23 de març e foguèt l’ocasion de faire un primièr bilanç.
 
Dempuèi la debuta de la crisi de la liquidacion de l’ensenhament de l’occitan i a dos meses, la situacion evoluiguèt favorablament. I a qualques elements positius, mas sovent simbolics coma la creacion d’un ensenhament d’especialitat en occitan, e subretot la restitucion d’oras dins los establiments del segondari dins l’acadèmia de Tolosa. Aital, sus las 700 oras d’ensenhament de suprimidas a la debuta, mai de 500 ne foguèron restituidas. Mas, a l’ora d’ara, mancan totjorn 130 oras... La situacion es totjorn complicada en Bigòrra.
 
En mai d’aquò, l’ataca contra l’occitan es pas limitada a l’acadèmia; es concertada. Las autras acadèmias son tocadas (Niça, Ais-Marselha), las baissas de mejans son fòrtas dins lo segondari, e tanben per Calandreta. Es una volontat politica de tuar l’ensenhament de l’occitan accentuada pel rectorat. La rectritz mentiguèt al CRÈO Tolosa e i a totjorn pas d’engatjament sieu suls mejans especifics per l’an que ven.
 
Cal veire tanben lo refús de J.-M. Blanquer, malgrat de nombrosas intervencions, de permetre l’egalitat entre las Lengas e Culturas de l’Antiquitat (LCA) e las Lengas e Culturas Regionalas (LCR).
 
I a de causas positivas, ça que la. Lo CRÈO recebèt lo sosten de nombroses elegits locals de totas tendéncias, i a las demandas de mai de descentralizacion. Es donc lo moment d’ensajar de tocar E. Macron e de far avançar las accions parlamentàrias.
 
Las calandretas son tanben atacadas. La rectritz refusèt lo convencionament de la classa de 4a del collègi Calandreta de Tolosa que manda sos escolans al licèu Sant Sarnin. Las calandretas vòlon preparar una accion e obtenguèron lo sosten del CRÈO. Tanben d’ensenhaires de Calandreta de l’acadèmia de Tolosa ara poiràn aderir al CRÈO Tolosa.
 
Lo CRÈO participarà l’8 d’abril, al Palais de Luxemborg a París, a un rescontre amb los parlamentaris. Se reüniràn los representants còrses, bretons, alsàcians, occitans e bascos amb de deputats e senators. D’aquesta passa, son los occitans que son a la manòbra, çò que càmbia dels autres còps. Lo matin de l’8, se farà un bilanç de la reforma del bachilierat e de la lei sus “l’Escòla de la Fisança”. Dins l’aprèp-miègjorn se rescontrarà la premsa e los elegits amb lo depaus d’una letra a l’UNÈSCO e una conferéncia de premsa.
 
Totes son contents de veire que las LCR foguèron un dels tèmas importants del “Grand Debat”, degut a la crisi dels Gilets Jaunes. Aquò es la pròva d’un cèrt estacament a l’occitan dins la societat.
 
Enfin, lo CRÈO se pausèt la question d’accions publicas per mobilizar mai largament la populacion. Perqué pas un festenal, amb l’ajuda d’autras associacions? Totes son d’acòrdi per d’accions mediaticas.
 
 
 
 
Nicolau Rei Bèthvéder
President del CRÈO Tolosa
 
 
 


abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

francesc palma
7.

Lo Centre Regional dels Ensenhaires d'Occitan, amb l'ajuda e solidaritat de totas las femnas e dels trabalhadors capitaran amb la luita e amor per la lenga nostra. Endavant companyas e companys !

  • 1
  • 0
Lo Castanhièr de la Castanhassa, bastonaire en cap Paris , Super-Dupont Ville
6.

#4 Petropavlosky ? Kamtchatakoff ? Anastasianovich ? Puta, avia plan rason lo Macron ! Tant coma los gilets jaunes, emai lo CREO es manejat per lo Poutine ! Tot es clar, la pretenduda reivendicacion occitana es res qu'un manipoli de l'anti-França pilotat pels russes ! Es grèu, força grèu, la patria es en perilh. Sus a l'envaseire, coma a Valmy, me damne !

  • 16
  • 0
oksitanlaştıramadıklarımızdanmısınız
5.

#4

òf Mancat !
Critiqui pas lo CREO nimai Tolosa, nimai lo CREO de Tolosa, nimai los foncionaris, nimai Occitània, e nimai tot çò que voldretz.
Critiqui un sistem perniciós, que nos far demandar ajuda als que nos vòlon negar desmpuèi gaireben seglès. ( es vertat tanben que podem pas far autrament, enquèra que benlèu que lo papa…)
L’ajuda es en rapòrt del poder e del gra de nosença nostras, dins de limitas çaquelà, es pas un sistem extensible. Autrament dich sabem qu’aurem que çò que nos voldran balhar !
Que lo CREO faguessa batesta es plan e an ganhat lo drech d’i tornar amb’enquèra mai de vam.
Damora que lo sistem es totjorn perniciós e es aquò que critiqui.
Ai cap de solucions, mas sabi que cal pas jogar tot sus l’escòla e que devem trobar un autre sistem d’ensenhament e de popularizacion. Sabi tanben que cal diser la vertat amai s’es pas bona a diser e sabi tanben que de las criticas sortisson de melhoraments e lo fach de critiquar es la debuta de cambiar e d’enantir.
Dins l’estat actual, pensi pas qu’es sonque l’escòla que nos permetrà de salvar l’occitan, se volem lo salvar nos cal far mai e subretot trobar mai. Mas per trobar cal començar de cercar e per cercar cal començar de diser que tot va pas plan e que se tot anava plan, lo somcim de l’esperat nòstre ( tot l’ensenhament en occitan, dins totas las materias e totas las escòlas d’Occitània), e ben o poriam pas capitar d’aqui qu’avem pas pron monde per ensenhar en occitan e que nos caldria d’annadas per poder formar tot lo mond. E parli pas de la vida fòra de l’escòla.

Part aquò me pensavi que lo Kamtchatka èra enebit als estrangièrs…. La causas aurian cambiat e degun auria far lenga ? Ges mon díu !

Benlèu nos parlaràs dels Koryaks e Itelmènes, nos cambiaria…

  • 11
  • 0
Astanavich Virolet Petropàvlovsk-Kamchatski
4.

Critiquetz lo CREO Tolosa, que son d'ensenhaires foncionaris de l'Estat francés, mas a que volètz que demanden de mejans ? Al Jornalet ? Al Papa ?

Lo president de l'Estat francés, dont fa part gaireben tota l'Occitània e que lo volètz o non, es Macron.

Sembla logic qu'aqueles foncionaris demandan de comptes a lor patron. Apuèi son pas nècis e sabon lo mesprètz de las elitas parisencas per l'occitan.

Critiquetz mas prepausètz pas res de concrèt.

Lo CREO se bat mentre que vosautres combatètz los que se baton per salvar l'ensenhament de l'occitan.

Sètz de constructius !

  • 13
  • 3
Los Grimm Fraires, especialistas en contes e sansonhas de totas menas dempuèi dos sègles Païs Blau de las Meravilhas
3.

#1 Tè, me semblava qu'en campanha lo Macron (o benlèu lo Philippe ?) que rencostrèt per cas lo Joan-Loïs Blenet entre doas portas se diguèt '"interessat" per l'occitan. A l'epoca aquò foguèt comentat amb un bèl estrambòrd pel Jornalèt. Seria quand mèsma impossible qu'aquel brave tipe de Macron reneguèsse aquela dicha que, pareis, faguèt als occitans, vertat ?

  • 28
  • 4

Escriu un comentari sus aqueste article