L’activista aranesa e occitanista Mireia Boya anoncièt divendres passat sa demission del Secretariat Nacional de la CUP e de la politica catalana, per prene d’aire e de fòrças. Dins una letra publicada suls rets socials, Boya revelèt que pendent lo periòde que foguèt deputada aviá patit un secutament psicologic continú de part d’un camarada, çò que li a provocat un malaise emocional complicat totjorn present. Dins sa letra, Boya explica que davant las circonstàncias excepcionalas per la politca del país, lo referendum e la posteriora repression, qu’ela tanben n’es tocada, decidiguèt d’èsser fòrta davant aquel secutament. Ara, totun, a l’ora de tornar trobar l’assalhidor a causa de son prètzfach dins lo Secretariat Nacional de la CUP, la politiciana aranesa a decidit de “se sonhar”. “Me’n vau conscienta de deishar er enjòc collectiu de melhorar era gestion des agressions masclistes”, çò afirma.
 
Totun, Boya precisa qu’es pas un “adiu” mas un “a plan lèu” e ramenta que “lèu mos tornaram a rescontrar enes carrèrs, enes places, pertot, e a lutar amassa entà uns Païsi Catalans e ua Occitània mès liures, feministes, ecologistes, anticapitalistes, antifaishistes e antiracistes”.
 
De son caire, la CUP a reagit dins un comunicat que ditz que lo comissariat feminista de l’organizacion s’engatja a trabalhar amb mai de vam que jamai per bastir una organizacion amb un espaci de participacion “segur” per las femnas e per totas las personas”.
 
Las mòstras de sosten envèrs Mireia son estadas nombrosas.
 



 

Tostemp tamb tu en aguesti moments @yeyaboya. Sonque era valentia mos hè liures e pòt cambiar eth món. Atau ei coma ac demòstres tu, tamb valentia. Ei er unic camin. Tota era mia estima. Mos vedem lèu, quan volgues, on volgues e tamb un cassís des nòsti. https://t.co/JupysI2M1z

— Anna Geli (@geli_anna) 29 de març de 2019