Bandièra01 1180x150: País Invisible

Actualitats

crotz-tolosaCreated with Sketch.ProvençaProvençaVencenc

Thales Alenia Space menaça 500 emplecs a Canas e Tolosa

Los dos sits son complementaris dins la fabricacion de satellits d’observacion e de telecomunicacion e emplegan respectivament 2000 e 2500 salariats

La direccion del sit canés a dich que dins las setmanas a venir liurarà una analisi detalhada”, per çò que se pòt dedusir que Canas serà pus tocat que Tolosa
La direccion del sit canés a dich que dins las setmanas a venir liurarà una analisi detalhada”, per çò que se pòt dedusir que Canas serà pus tocat que Tolosa | Guy Lebègue
La societat espaciala Thales Alenia Space (TAS) anoncièt dimècres passat la supresion de 500 emplecs suls sits de Canas e Tolosa. La mesura estonèt pas degun. D’efièch, lo 25 de genièr passat, de centenats de personas avián manifestat a Canas, inquiets de la manca de comandas.
 
Los dos sits son complementaris dins la fabricacion de satellits d’observacion e de telecomunicacion e emplegan respectivament 2000 e 2500 salariats.
 
Segon la direccion de la societat, “[travèrsan] conjonturalament un periòde d’alentiment dels mercats d’observacion optica e de telecomunicacions dins l’espacial. Las comandas son pas al rendètz-vos e [se mobilizan] per reversar aquela tendéncia e obténer de contractes. En esperant, [son] dins lo constat d’un problèma d’adeqüacion entre [lors cargas e lors] efectius sus [lors] sits de Canas e Tolosa”, çò explica la direccion de la societat a Nice-Matin.
 
 
Sembla que lo sit de Canas serà pus tocat que lo de Tolosa
 
Ara per ara, sabèm pas quals son los perfils dels emplecs que se poirián pèrdre. La comunicacion de la societat es discreta. Mas la direccion del sit canés a dich que dins las setmanas avenidoiras remetriá “una analisi detalhada”, çò que fa deduire que Canas serà pus tocat que Tolosa.
 
Es verai que lo mercat mondial dels satellits de telecomunicacions geoestacionaris a patit una casuda de las comandas, çò qu’evòca la direccion de TAS. Ça que la, cal dire que TAS a generat una chifra d’afars de 2,5 miliards d’èuros en 2018.
 
Tanben es exacte que se TAS produsiá entre 30 e 35 satellits per an dins lo Mond dins los ans 2010, ne faguèt sonque mens de dètz entre 2017 e 2018. Per contra, TAS a enregistrat un recòrd de lançaments amb 50 satellits en orbita en 2017 e 33 en 2018.
 
A l’ora d’ara, la societat cèrca de gròsses contractes que “serián una botiòla d’oxigèn mas arribarián pas de remetre en causa aquelas supressions d’emplecs”.
 
De soslinhar que lo sit de Canas es ja jos un plan moderat d’adaptacion que tocariá 150 CDI e 150 sostractants.
 
 


abonar los amics de Jornalet

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

JCd
2.

Que foten monde au caumatge pendent que la nosta lenga es a crebar ! Vergonha !

  • 0
  • 1
Pitaluga
1.

Son los novèls mestièrs que segon lo liberalisme descabestrat de la Macronia devon crear d'emplècs a bodre. Començan per fotre lo mond defòra. E per nos consolar nos abeuran de promessas per badalunas.

  • 1
  • 0

Escriu un comentari sus aqueste article